J'tais dans un pré tchi 'tait dans un p'tit vallon. Un p'tit russé coulait par l'vallon. Par chu bord-chîn du russé, y'avait d'l'hèrbe et tchiques pliantes sauvages lé long du russé. Y'avait un p'tit pont en bouais pouor crouaîsi l'russé et à l'aut' bord y'avait eune p'tite sente tchi m'nait à la brècque d'la banque et par la brècque jé viyais des courses. Ch'tait des courses à zébrânes - des p'tites bêtes d'la grandeu d'un tchian tchi 'taient mêlés d'ânes et d'zèbres. Il' avaient l'pé pus à co rouôgeâtre épis les gambes et eune partie du corps rilyies coumme des zèbres. I' couothaient bein quédaine. Les jockeys 'taient bein trop grands pouor ches p'tits zébrânes. Quand les courses fûtent finnies, nou cachit un troupé d'zébrânes par la brècque dans l'pré. Les zébrânes 'taient s'posés d'couôrre par la sente et l'travèrs du p'tit pont pouor arriver iou qué j'tais sus l'hèrbe tchi d'valait au russé. Mais l'pont avait des gril'yes en fi d'fé des deux bords et y'avait tant d'run entré les fis qu'les p'tits zébrânes lus sîlyaient par les creux dans les gril'yes au run d'crouaîsi l'pont coumme nou les cachait. J'èrgardais les zébrânes à couôrre chîn' et là et, quandi qu'nou-s'êprouvait d'êtouper les creux atout acouo des fis d'fé, i' m'sembliait qu'ches bêtes avaient un mio d'pônîn d'Shetland en ieux étout, et achteu i' sembliaient un mio pus p'tits, d'la grandeu d'un cat, ofûche. J'm'èrtouônnis pouor ramonter l'vallon et y'avait du sablion et d'la vase et j'gabathais amont.
Rêvé l'26 d'Août 2014
Viyiz étout: