Les Pages Jèrriaises

Un rêve

J'têmes dans un grand par auve des cârrés d'bliête auve des c'mîns tchi crouaîsaient l'par. Lé solé lithait et y'avait tout pliein d'monde coumme si ch'tait eune grande fête. Dans l'par y'avait des pavillons à deux êtages auve des êvènements. Y'avait un pavillon dé tchi la côtchiéthe 'tait couèrte par eune ênorme couleu Nouormande.

Iun des pavillons avait eune mouontréthie d'couleurs sus la côtchiéthe en deux rangies, mais les couleurs pendaient sus des p'tits mâts toutes pliées et nou n'pouvaient pon vaie vraînment dé tchi pays qu'ches couleurs 'taient. Coumme i' 'taient pliées i' sembliaient qué y'avait des couleurs dé swastika parmi la mouontréthie.

Ieune des hardelles 'tait eune gardgienne du par et oulle accordit d'haler discrètement sus eune corde à seule fîn dé l'ver eune carre des couleurs pouor qué nou pûsse vaie les patrons des couleurs. I' 'tait d'mêtchi d'faithe chenna d'pathe sans attriotchi d'l'attention, car y'a du monde partout.

La gardgienne, tchi 'tait en unniforme et mâtée sus la bliête l'avant au pavillon, halit douochement sus la corde et l'vit par tchiques dégrés eune carre dé toutes les couleurs et nou vit qué l'patron tchi sembliait êt' un swastika quand les couleurs pendaient pliées 'tait un patron dé couleu d'la mathinne en rayons d'solé en difféthentes couleurs. J'prîns des photos à seule fîn d'prouver la réalité des couleurs.

Rêvé l'25/12/2018
 

Viyiz étout:

 

Les Pages Jèrriaises