J'tais en vîsite siez des gens et à la fîn d'la séthée au run dé m'laîssi r'aller siez mé nou m'couochit dans eune chambre, dans un grand liet confortabl'ye. Pus tard j'réalîsis qué Nérina Pallot 'tait assise à la tête du liet et ou cachais l'liet (la tête en d'vant) par les c'mîns. J'tais acouo bein confortabl'ye mais comme j'allêmes avaû la Route dé Saint Aubîn pouor arriver en Ville, j'avais à m'garder souos la couvèrtuthe et sustout man bras car jé pâssêmes les vaituthes à un fi d'près.
Dé couôteunme jé n'marchais pon en Ville lé matîn et j'fus ravi quand j'eus à d'valer La Colomb'thie à pid et y'avait tant d'monde. Y'avait des fliotchets d'monde sus l'pavé des deux bords et n'y'avait pon assez d'run pouor les piêtons tchi marchaient dans la rue entre les vaituthes. Et quand j'arrivis où'est qué j'tais s'pôsé d'êt' en Ville jé mentionnis l'amas d'monde et nou m'dit qué ch'avait 'té d'même dépis eune pause.
J'tais hors pays et j'avais à r'aller d'èrtou en Jèrri l'sé en avion. Ch'tait l'arlévée et j'avais hardi d'temps pouor un change. Tout 'tait patchi dans les bagages et j'prîns un taxi pouor aller à l'aéroport. À l'aéroport jé montis, auve les bagages sus un tchéthiot, dans l'ascenseux à la halle, mais ch'tait la halle d'arrivées au run d'la halle dé dêparts. Heutheusement l'aéroport 'tait p'tit et l'aut' halle n'tait pon liain. Y'avait eune d'mouaîselle officielle tchi m'aîdgit et tchi m'offrit eune chambre dans tchi dormi jusqu'au dêpart. Y'avait des chambres pouor les viageurs dans eune allée entre les deux halles. J'dis mèrcie bein des fais mai qu'nânnîn pa'ce qué j'pouôrrais aîsiement espéther l'avion sans m'couochi. J'èrvîns ioù qu'j'avais laîssi ma tchéthiotée d'bagages et m'en r'fus d'vièrs l'allée entre les halles, mais j'm'en r'fus à l'entrée à seule fîn d'ramâsser tchiques habits qu'j'avais envyé hors; j'y'avais laîssi man vièr bliu bén'gône. J'pensais qué viyant qu'j'avais assez d'temps, j'pouôrrais bein prendre lé bén'gône auve mé sus l'avion.
Rêvé l'7/3/2021
Viyiz étout: