J'tais dans la grande maîson à un collecteux d'livres. Y'avait un office auve des livres sus des bâsses tabl'yes coumme eune mouontréthie. Y'avait un bel cârré entouothé d'allées à pilièrs et des partèrres au mitan. Lé maît' d'la maîson, un vyi, n'tait pon là, et mé j'tais là pouor trouver d'l'Informâtion ségrèement dans un livre ou des papièrs. J'faîthais feint d'êt' lé s'grétaithe-gardîngni et j'm'êcanchis à chèrfouoilli dans la maîson pouor l'înformâtion qué j'voulais. Sus les bâsses tabl'yes y'avait des vièrs livres auve des couvèrtuthes usées - n'y'avait pon d'êcrituthe sus les couvèrtuthes et i' t'aient dé difféthentes couleurs. Un p'tit vièr livre auve eune néthe couvèrtuthe et un mèrtcheux entre les pages sembliait întérêssant, mais jé chèrchais sus l's ais et dans les meubl'yes dé l'office. Dans eune aûmathe dans un drécheux jé trouvis l'corps du collecteux d'livres tout balloté. I' 'tait mort et y'avait des frâses êmaglyies sus s'n estonma, v'là tchi r'sembliait hardi à du sang. Jé n'savais pon tchi faithe. Jé freunmis l'vitchet d' l'aûmathe, laîssant l'corps d'l'houmme là où'est qu'i' 'tait, et j'décidis d'm'en êcapper. Mais jé m'démandis si j'dévthais voler l'livre întérêssant. Mais quand j'èrvîns pouor l'èrtrouver i' n'tait d'aut' là. Tchitch'un d'aut' l'avait-i' volé? D'vant qué j'pûsse happer la pathe, v'là tch'arrivit eune dgaîngue dé monde, voulant vaie l'maît' d'la maîson. Parmi ieux y'avait des membres d'sa fanmil'ye. J'eus à lus explyitchi qué j'tais lé s'grétaithe-gardîngni. J'avais du jus d'frâses sus mes mains et j'doutais qu'i' pûssent înmaginner qué j'avais assâsinné l'vyi s'i' trouvîtent lé corps. J'avais à rester dans la maîson quandi qu'nou chèrchait pouor l'maît' d'la maîson. Ieune des d'mouaîselles ouvrit l'aûmathe du drécheux et trouvit l'corps. Épis j'couothînmes partoute la maîson pouor trouver l'responsabl'ye. Y'avait eune grande halle, dans les trais ou quat' êtages dé haut, auve des allées à balustrade et des montées tout l'tou. Les muthâles 'taient peintes dé portraits dé couleurs bein cliaithes tchi couvraient les muthâles, l's allées et tout. La peindrie 'tait pus à co du style Art Déco ou un mio Byzantîn coumme dans eune églyise Orthodoxe, mais ch'tait tout modèrne auve des grandes faches dé membres d'la fanmil'ye sus l'pîngnon et des louêmes dé couleu tchi d'valaient par les allées à balustrades. Jé couothêmes amont et ava les montées d'la halle.
Rêvé l'10 d'Octobre 2015
Viyiz étout: