Un jour, dans les 1460, dans l'temps qu'les Français avaient envahi l'êst d'l'Ile et prîns l'Vièr Châté (d'Gouorray), certains d'ches-chîn, tchi d'gettaient tréjous pouor êprouver à happer Ph'lippe dé Carteret, lé Seigneu d'St Ou (et l'champion du ouêst), étaient du Côté du Vau d'la Mathe (êcrit officiellement Le Val de la Mare), ayant arrivé à j'va en cachette par les Grèves.

Chu jour-là Ph'lippe dé Carteret 'tait à la pêque trantchilement à la Mathe au Seigneu, tchi s'trouve entre les Grèves de St Ou et san Mangni.

Tout d'un coup il avise l'ennemin; i' saute sus san bieau nièr chéva et cache pouor lé Mangni! Mais d'vant arriver bein liain, né v'là eune aut' bande à sa rencontre.

I' vithe dé bord et file pouor lé Vau d'Tchithiéthe (êcrit Le Val de Charrière) - un passage ou tchithiéthe entre côtis d'a pic des deux côtés - vingt-deux pids d'laize et dgiex-huit pids d'hauteu. Mais les poursuivants lé t'naient quâsiment, et heurlant i' li criaient 'Rendez-vous! Rendez-vous!'

Ph'lippe dé Carteret éthait aimé mus la mort qué d'être prîns.

Arrivés au Vau d'Tchithiéthe, i'n'manquent pon j'va et homme sé lanchent par dessus et, ayant d'vanchi les Français, sé rendent au Mangni tchiques moments auprès!

Mais tchi course! Le pouor chéva 'tait à but, et i' tchit mort souos san maître. Et, dé chagrîn, lé seigneur voulit l'entèrrer dans l'gardîn du Mangni.

FLM