Les Pages Jèrriaises

Un rêve

Y'avait eune grande bordée siez l'Gouvèrneux et y'avait un fliotchet d'monde bein habilyis dans eune ênorme salle bein êcliaithie à haut d'eune montée d'laîze auve un rouoge tapis couôsu d'un riche patron. Dans la salle y'avait un politicien Améthitchain à tchi qué j'pâlais. L'Ambassadeu Améthitchain vînt nos r'jouaindre. J'avais les mains jouaintes l'avant à mé et l'Ambassadeu voulit m'offri du vîn. I' n'rêalîsit pon qu'j'n'avais pon d'vèrre et, dé d'dans eune dgougue, i' m'vèrsit du blianc vîn dans mes mains. Tch'est qu'j'allais faithe auve eune galenie d'vîn? J'couothis l'tou d'la salle où'est qu'i' y'avait des tabl'yes couèrtes d'un blianc doubliyi et des vèrres dessus. Mais sait les vèrres 'taient dêjà remplyis d'vîn ou sait i' 'taient à dêmain. J'hêlis tchitchun driéthe ieune des tabl'yes - un învité pon un sèrveux - pouor mé pâsser un vèrre à seule fîn qué j'pûsse viédgi mes mains dans l'vèrre. Épis la salle 'tait tchaque auve du monde faichonnabliément habilyis et y'avait des gens împortantes à tchi qué j'voulais pâler mais nou n'avait pon assez d'temps coumme tout l'monde pâssaient.

Rêvé l'23/2/2018

 

Viyiz étout:

 

Les Pages Jèrriaises