Les Pages Jèrriaises

Des rêves

Y'avait trais bein grandes bangnérêsses alîngnies par les bords l'ieune au pid d'l'aut'. I' 'taient bein longues, et 'taient ofûche en pliain air ou par dédans, mais i' 'tait cliai tout coumme et faîthait caud. L'ieau 'tait douoche et caude et y'avait du monde à nagi et à s'pronm'ner l'long des bangnérêsses. Dans les bangnérêsses y'avait des nattes fliottantes pouor s'êtrav'ler d'ssus. Ches nattes 'taient ênormes et 'taient grées d'quat' cârrieaux attatchis en forme dé crouaix. I' 'taient un mio orangeâtres ou breunâtres, rîlyies et douoches, coumme s'i' 'taient en pliuque. I' 'taient bein confortabl'yes et des mousses 'taient à sauter et r'bînder et jouarder d'ssus. J'tais êtrav'lé sus ieune des grandes nattes et ch'tait coumme un divèrsément grand ouothilyi.

Nou m'dit qu'sa tante avait eune maîson pus à co au Nord du pays et qu'châque Stembre quand nou satchait l'caûffage d'la maîson, un fliotchet d'crapauds v'naient lus abrier dans lé ch'lyi. Épis quand nou dêtouônnait l'caûffage au R'nouvé les crapauds lus dêhalaient d'siez la tante et couvraient l'tèrrain tout l'tou d'la maîson en creusant dans l'chînment des c'mîns et grugeant les fossiles tchi 'taient d'dans. Nou n'înmaginnait pon combein qu'i' y'en avait d'crapauds, et quand il' avaient pâssé nou viyait dans l'aithe les fossiles en colînmachon dans la pièrre qu'les crapauds avaient dêmuchi en d'sèrtant la tèrre.

Rêvé l'30 dé Septembre 2014

 

Viyiz étout:

 

Les Pages Jèrriaises