Les Pages Jèrriaises

Un rêve

J'pâssais par lé Collège Victoria et j'èrmèrtchis qu'i' y'avait un tas d'monde sus les tèrrains. J'entris et j'vis l'prîncipa tchi 'tait là à pâler auve deux-trais pèrsonnes. Jé m'sîlyis dans la convèrsâtion. Lé prîncipa m'dit qu'i' voulait qué j'èrvînsse ensîngni au Collège mais j'dis qu'nânnîn. Tout comme s'i' n'tait pon contre jé voulais haler des portraits des faches stchulptées sus la côtchiéthe du grand bâtisse du Collège. "Les stchulptuthes?" qu'i' mé d'mandit, et j'confirmis qué né v'là chein qué j'voulais faithe achteu.

J'm'en fus au grand us du Collège. Y'avait un tas d'collégiens à y'entrer, et hardi dg'ieux portaient d's unniformes dé cadet militaithe. Accanté ieux j'entris dans l'grand bâtisse du collège au run d'rester l'avant à l'us pouor haler des portraits des faches. Par-dédans y'avait la grande halle du Collège mais ou 'tait ès bas et d'travèrs. Y'avait eune cérémonie en allant dans la halle. Les collégiens et l's învités lus assiévîtent, quandi qu'mé j'restis en driéthe dans eune manniéthe d'allée d'un bord d'la halle à l'aut' où'est qu'i' y'avait des pliaques et des monuments.

Épis jé m'dêhalis pouor èrgarder les faches stchulptées sus la côtchiéthe lé tou d'l'us tchi 'taient hardi grandes, épis y'avait d'aut' muthâles auve des pliaques dessus.

Rêvé l'31/10/2022
 

Viyiz étout:

 

Les Pages Jèrriaises