Les Pages Jèrriaises

Un rêve



Ma douoche 'tait dans eune bliue bedgône à graie l'dêjeuner.

L'office 'tait grande et modèrne. Y'avait eune grande fénêt' à dêtre tchi 'tait toute la muthâle. Y'avait eune mangnifique veue sus la côte. I' n'y'avait pon hardi d'bâtisses. L'office s'adonnait sus eune pétite baie sans grève - y'avait d'la bliête jusqu'ès bords d'la mé, tchi 'tait calme et bliu. Lé solé lithait. D'l'aut' bord d'la p'tite baie, y'avait un bas longis d'tèrre. Sus l'but d'chu longis y'avait deux-trais bouais, des bîssons et eune maîson en bouais.

En d'houors d'l'office y'avait eune pus grande office auve un tas d'êcritouaithes et d'monde. J'têmes à distchuter s'i' 'tait d'mêtchi d'freunmer la porte car y'avait trop d'brit, quand j'vis eune expliôsion par la f'nêt'. J'vis eune ênorme balle dé fliambe en l'air - jaune, et rouoge et néthe. Ch'tait coumme dans un film. Mais jé n'ouïyais rein par la f'nêt'. Les bouais et bîssons et eune partie d'la maîson sus l'longis d'l'aut' bord d'la baie 'taient en fliambes. Des gens couothaient chîn et là à seule fîn d'dêteindre les feurs. Ch'est en tchi il' avaient 'té à graie un r'pas à la broche sus un gril sus la bliête à l'avant d'la maîson et chenna s'tait soûfflié hors.

Les aut's gens n'avaient pon r'mèrtchi la soûffliéthie par la f'nêt' - v'là tchi 'tait ravissant. "Tchi barbecue!" qué j'fis.

Geraint Jennings
17/5/2010


 

Viyiz étout:

 

 

Les Pages Jèrriaises