Dans lé c'mîn pons'leux y'avait un grand rose oeu, manniéthement grand coumme lé chein d'eune autruche, tchi 'tait pouor êcliôre. L'oeu cratchit et eune tête d'ouaîsé s'dêhalit épis rentrit dans la cruque. J'app'lis l's aut's pouor v'nîn vaie l'oeu. Et j'èrgardînmes l'ouaîsé s'en dêhaler. Ch'tait eune caûvette à longue coue auve des grands pids. Ses p'tites plieunmes 'taient néthâtres et êcarses et douothées d'mucreu. L'ouaîsé s'craînchait sus lé c'mîn et s'pathannait. Y'avait d'aut's oeux tchi 'taient êclios et y'avait des p'tites caûvettes (tch'avaient dans les souaixante centimètres dé haut tout coumme) à couôrre chîn' et là tout l'tou. Ch'tait si întérêssant qué j'décidis d'rester là acouo eune bordée ouaithe qué j'fûsse s'posé d'aller à l'églyise pouor un sèrvice. J'tais en r'tard quand j'arrivis à l'églyise et l'sèrvice 'tait en allant. L'églyise 'tait grande coumme eune cathédrale, toute en pièrre. Les bancs 'taient dans eune grande haute salle et à sénêtre pus à co en driéthe y'avait, assis sus un banc, un êvêque Français à tchi j'pâlis en Français. I' 'tait vyi et genti, ch't êvêque, et i' s'adonnait qu'lé Pape 'tait là dans l'églyise chu jour là. Lé monde faîthaient eune longue tcheue dans la salle pouor vaie l'Pape et j'tais pouor tchitter mais l'êvêque m'învitis d'l'accompangni pouor vaie l'Pape. I' criyait, j'crai, qué j'tais eune manniéthe dé prêtre. J'halis man colyi et m'en fus dans la dgaîngue d'l'êvêque vaie l'Pape. Lé tchoeu d'l'églyise 'tait bein êtrait à compather d'auve la grande salle (coumme un co d'boutelle). Y'avait eune grande montée en pièrre pouor monter au tchoeu, épis y'avait des rangies d'bancs des deux bords. Lé Pape 'tait habilyi en blianc, assis à sénêtre au mitan des bancs, et j'pâssis l'avant à li dans un fliotchet d'monde bein quédaine (raîque eune s'gonde ou deux pouor pâsser avaû l'tchoeu) épis nou-s'en sortait par un us à dêtre. Ayant halé man colyi, j'tais habilyi d'eune quémînsole, v'là tchi fut approuvé auve un souôri par l'êvêque.
Rêvé l'7/4/2013
Viyiz étout: