J'têmes à pratitchi pouor eune présentâtion dramatique et j'têmes dans eune maîson, assez vielle auve tchiques êtages et d's êtraites allées. L'histouaithe d'la pièche 'tait entouor des r'vénants, et à seule fîn d'êmoûtchi d'la peux parmi l's acteurs, lé directeu mé d'mandit d'jouer l'rôle du r'vénant et d'enfaûtômer l's actrices. Mais i' n'dgèrnit pon les hardelles qué jé s'sais pouor l's êffriter. J'tais habilyie d'un gris corset à capuchon, êpais et bein confortabl'ye, et les hardelles, ieux, portaient étout des mos gris habits. La maîson n'tait pon hardi êcliaithie mais y'avait assez d'leunmiéthe sénon pouor d's ombres chîn' et là dans l's allées dans tchi qué j'mé muchais. Coumme les hardelles lus arroutaient par l's allées en faîthant l'feint d'vîsiter eune maîson vîsionnée, jé m'dêhalais sans brit et douochement d's ombres et dgêpais l'tou d'eune hardelle, tchiquefais faîthant l'feint d'les embraîchi quâsîment et pâssant ma fache ombrée dans l'capuchon à un fi près d'lus longs g'veux, lus co, lus êpaûles. Les hardelles, un mio ravies, jouaient tout coumme tréjous en faîthant l'feint dé n'pouver pon m'vaie mais d'senti ma présence dé r'vénant et d'êt' pus à co gênées par ma mystéthieuse présence. Jé n'savais pon si ch'tait exactément chein qu'lé directeu voulait, mais l'êffet dramatique sembliait marchi.
Dans la bibliothèque d'eune maîson y'avait des gens en habits d'séthée assises lé tou d'eune pétite tabl'ye l'avant à la porte. Mé, j'tais d'but pus à co dans l'mitan d'l'appartènement, sus un tapis auve eune riche rouoge décothâtion. Y'avait d's ais pouor des livres sus des pathais en êtchèrre d'la muthâle et des pannieaux d'bouais et des meubl'yes êlégants auve des vases et des machinnes-chouettes coumme des changlièrs et d'ité. Iun des mêssieurs attabliés dêhalit sa bourse et l'ayant ouèrt, il y trouvit eune fielle dé tchiquechose auve un p'tit objet dans. Nou dit: "Ch'est tréjous mauvais sîngne quand nou trouve tchiquechose dans sa bourse tchi n'dévthait pon êt' là." Épis précaûcieûthement jé m'abriyis driéthe un pathai d'ais d'bibliothèque d'vant la soûffliéthie espéthée. D'un co eune aûtchie d'rose feunmée dêgôlit d'un vase sus eune bâsse tabl'ye et j'couothis hors pouor êcapper la feunmée. En d'houors dans la rue y'avait acouo d'la rose feunmée coumme d'la mousse tchi couvrait des gens et j'couothis à dêtre pouor arriver à la côte. J'couothais d'même viyant qué ch'tait coumme un film et né v'là chein qu'les acteurs sont s'posés d'faithe.
Rêvé l'3/9/2019
Viyiz étout: