J'tais dans eune ville et jé d'valais eune rue auve des maîsons et des boutiques et des bouais. Les bâtisses n'taient pon bein hauts et ch'tait tout charmant. Au liain driéthe les bâtisses à dêtre jé viyais un copé rotcheux tch'avait d'la vèrduthe parmi les pièrres. Au haut du mont y'avait eune falaise tchi n'tait pon stabl'ye. Des pièrres en tchiyaient, et j'pensais qué v'là tch'êcrouôl'lait bétôt et j'gardais l'yi sus. Y'avait des piêtons sus les trottouaithes d'la rue et des boulants et ch'tait un pliaîsi d'pédaler douochement. Des rotchièrs tchiyaient d'la falaise épis tout l'haut d'la falaise drotchit. V'là tchi poussit eune rangie d'bâtisses à s'nêtre d'la rue amont la rue. Un grand ouadgîn fut poussé amont la rue sus l'trottouaithe. Y'avait eune janne femme auve eune cârrosse à mousse l'avant à mé sus l'trottouaithe, lé dos au ouadgîn tch'appréchait. J'lî briyis dé s'cârrer, mais ou m'souôrit et continnuait trantchil'yement à pousser la cârrosse sans s'gêner d'l'apprèche du ouadgîn driéthe lyi. L'ouadgîn fit un var au drein moment et pèrchit la d'vantuthe d'un p'tit supèrmarchi à s'nêtre et fut arroué là l'travèrs du trottouaithe. La janne méthe mé rasseûthit qu'i' n'y'avait janmais ieu d'dangi et s'en fut trantchil'yement coumme dévant. J'pâssis l'ouadgîn tchi bliotchait la côtchiéthe du supèrmarchi auve tout l'vèrre bûchi et d'valis la rue. La rangie d'bâtisses tch'avait 'té poussée amont la rue avait rempliaichi les boutiques tch'avaient 'té là d'vant. Y'avait eune boutique d'eune êtchipe Portûndgaise dé football tchi vendait des corsets d'sport et tout chenna. La boutique 'tait peinte en jaune cliai et d'aut's couleurs.
Rêvé l'21/10/2017
Viyiz étout: