J'têmes dans un avion, un p'tit avion, tchi frâsait les copieaux des bouais coumme jé crouaîsêmes lé paysage au stembre. Les fielles 'taient jaunes, orandes et breunes et y'avait coumme un êchitchi d'clios tout ensolilyi en d'ssous d'nous et la côte à gauche et la mé lithait bliue au solé. Les pilotes fîtent des triques d'aérobatiques en faîthant touônnyer et rouôler et topinner l'avion pouor qu'lé nez du vaîssé touchîsse quâsîment la têrre et l'copé d'bouais. Ch'tait un mio gênant viyant qu'i' n'taient pon s'posés d'faithe d'itelles triques, mais ché n'tait pon êffrédolant.
Dan la côsse dé l'avion y'avait un aithe dé laîze couèrt d'eune pétite couoche dé pité sus tchi qu'les pilotes pliaichaient des buts d'vrai, en difféthentes couleurs, et des galots et amouoch'laient des lîngnes et des patrons en pité pouor èrprésenter des côtes coumme sus eune carte. I' bouogeaient l'vrai et les galots et l'pité pouor èrprésenter l'avanche d'la navigâtion pouor pratitchi. Pouor un p'tit avion, ch't aithe tch'allait d'un bord d'la côsse à l'aut' 'tait hardi d'laîze.
Épis les pilotes èrchûtent un m'sage pouor dithe qu'not' avion dévthait aller à l'aîgue d'un aut' avion tch'avait 'té haïjatchi et nou nos dit d'nos rassiéthe dans nos sièges.
Rêvé l'13/11/2018
Viyiz étout: