Dans chu rêve-chîn, j'tais l'aûgni d'un restaurant. Ch'fut lé jour d'ouvèrtuthe du restaurant mais jé n'l'avais janmais visité - et jé n'tais pon même sûr où'est qu'i' s'trouvait. J'tais à chèrchi pouor man restaurant, auve un gris sac à dos auve des grandes blianches plieunmes d'autruche sus, attatchies par du fi d'pé d'autruche tchi 'tait nièr et fîn et fort. J'portais un mat'nas pneumatique étout, mais jé n'sais pon pouortchi.
J'trouvis un lieu où'est qu'i' y'avait trais bâtisses - deux auve un êtage - et l'traisième 'tait tout p'tit auve deux êtages. I' n'y'avait pon d'leunmiéthe dans lé p'tit bâtisse mais les deux aut's bâtisses 'taient tout êcliaithis. I' 'taient des restaurants - ou bein des cafés - auve des leunmiéthes, des tabl'yes, des sèrveurs tchi sèrvaient les gens entouor les tabl'yes, et i' y' avait d'la musique étout.
Les sèrveurs dans l'un des restaurants, 'taient habilyis en nièr et blianc auve des longs d'vant'tchieaux, mais dans l'aut' restaurant (tchi 'tait pus proche au bâtisse auve deux êtages) les sèrveurs 'taient des jannes garçons habilyis dans des longues bliues câsaques.
Mais autchun d'ches deux restaurants n'tait pon man restaurant à mé - l'mein 'tait l'chein où'est qu'i' n'y' avait pon d'leunmiéthe. J'entris dans l'bâtisse et montit la montée. J'ôtis man sac à dos et les plieunmes tchîtent dans l'aithe. J'vis deux belles sèrveuses et l'houmme tchi mênageait l'restaurant pouor mé. I' tait assez capabl'ye, sembliait-i'. J'allis dans la tchuîsinne tchi 'tait grande et modèrne - et viède. J'laîssis lé mat'nas dans la tchuîsinne et r'vînt dans la salle à mangi. Dans l'restaurant i' y'avait des p'tites rondes tabl'yes - mais i' n'y' avait pon d'clients. L'restaurant 'tait bein pus grand d'dans qué d'hors.
Nou pouvait r'garder bas par les f'nêt's dans l'restaurant en fache où'est qu'les garçons dans lus bliues câsaques couothaient dé tabl'ye à tabl'ye.
Des clients montîtent la montée. Les deux sèrveuses pâssaient les tabl'yes sans rein dithe et achteu i' y'avait des chandelles sus les tabl'yes et l'bâtisse 'tait pliein d'leunmiéthe. L'houmme tchi avait mênagi l'restaurant pouor mé avait fait du bouan travas.
18/3/1999
Viyiz étout: