Ch'tait dans un jeungl'ye. Y'avait eune motte, du tèrrain êl'vé d'deux-trais mètres dé haut, au bord d'un dou ou russé d'un mètre ou deux d'laize et tchi 'tait quâsiment copé du tèrrain à l'entou par l'dou. Y'avait eune plianque, grée d'deux trous d'bouais, pouor crouaîsi d'la motte au restant du jeungl'ye. Sus la p'tite motte, pas pus qu'dgiêx mètres dé laize, y'avait un p'tit camp d'soudards - eune d'mié douzaine dg'ieux. Y'avait des pitchets mâtés l'tou du bord d'la motte auve des veues à hielle - ou des lantèrnes à chandelle - pendues d'ssus. Y'avait un tèrpâlîn d'canmoufliage dans l'aithe souos tchi les soudards lus couochaient. Les soudards lus en fûtent patrôler dans l'jeungl'ye, et v'là tch'arrivîtent deux soudards enn'mîns tchi vîntent crouaîsi la plianque. Dans l'dou y'avait des crocodiles et des vannieaux. Iun des deux soudards êprouvit d'crouaîsi l'dou mais i' drissit et s'ratrappit d'tchaie dans ieau parmi les crocodiles et gaffant des deux mains iun des trous d'bouais. I' mênagit d'èrgrîmper sus la plianque et s'êtrav'lit tout san long sus san dos sus la plianque. L'aut' soudard crouaîsit la plianque en pilant sus l'estonma d'l'aut' et d'chutte manniéthe i' crouaîsîtent la plianque touos les deux. Un co sus la motte, i' r'gardîtent tout l'tou et lus muchîtent souos l'tèrpâlîn canmouflié et espéthaient l'èrtou des soudards. Pus tard (jé n'sai pon chein tchi s'adonnit quand les soudards trouvîtent lus enn'mîns souos l'drap) les soudards 'taient en ville. Ch'tait eune pétite vielle ville sus un mont auve des raides ruettes pavées. Les soudards avaient à vérifier les beusses tchi pâssaient amont et ava l'mont et êchangi les veues à hielle - ou lantèrnes à chandelle - pendues du d'vant des beusses. Iun des soudards avait plianné d'tchitter la ville et aller auve l'enn'mîn sus iune des beusses, mais l'enn'mîn l'laîssit driéthe sus la beusse et i' fut bein d'sappouainté.
Rêvé l'11 dé janvyi 2016
Viyiz étout: