Les Pages Jèrriaises

Un Rêve



J'tais dans eune grande ville en Irlande du Nord. La riviéthe avait nom O'Malley, et les rues 'taient remplyies d'piêtons. Les muthâles 'taient en gris grannit et j'tais à chèrchi pouor eune cèrtaine boutique pa'ce qué j'avais à acater des livres. J'avais eune carte et y'avait, j'crai, deux femmes auve mé. I' tchiyait d'la plyie.

J'allînmes à l'Êst et j'trouvînmes un mûsée. L'mûsée avait eune boutique où'est qu'nou vendait toutes les manniéthes dé vielles cartes à jouer - des bein grandes et des p'tites. En pâssant par la boutique nou-s'entrit dans l'mûsée tchi 'tait bein modèrne. Mais driéthe les gal'lies nou pâssit dans un appartément privé - i' n'y'avait pon d'portes pouor distîndgi ou s'pather les gal'lies et l'appartément. Lé plianchais 'tait en bouais et les muthâles en bouais et vèrre et acyi.

Man fréthe allit dans la tchuîsinne et prînt eune paithe dé d'dans l'frigo, et l's aûngnièrs d'l'appartément arrivîtent et j'eûnmes à nos explyitchi.

 

Geraint Jennings
6/7/2003
 

Viyiz étout:

 

Les Pages Jèrriaises