Les Pages Jèrriaises

Un rêve

Ch'tait en Angliétèrre où'est qu'nou-s'avait annonchi un plian pouor amender et êlaîsi eune sente à piêtons à la campangne tch'avait des veues sus Stonehenge et l's Îles d'la Manche. Chutte sente 'tait sus eune manniéthe dé falaise bein haute auve des bouais et bissons au pouorportant des deux bords. La sente né pathaîssait pon en mauvais êtat - un mio pit'leuse mais d'eune grande laîze tout coumme. À drouaite et à gauche y'avait des brecques et eune p'tite sente m'nait à dans les quat' mètres à un rotchi en raccro d'où'est qu'nou pouvait r'garder l'travèrs d'la campangne Angliaîche sus Stonehenge d'un bord et, par la sente d'endrait, sus l's îles d'la Manche. Malheutheusement y'avait trop d'bliâse et jé n'pouvais pon vaie l's Îles ni Stonehenge nitout. Mais les clios 'taient visibl'yes au liain en bas, un mio embliâsés. Un amendement qu'nou pouôrrait faithe ch'tait d'coper les branques et vèrduthe des deux bords d'ches p'tites sentes dé travèrs - ieune 'tait pus empiêtée d'vèrduthe qu'l'aut'.

Nou soulait aver un tas d'touristes par là mais la sente 'tait un mio dêlaîssie. Un mio d'vant les sentes dé travèrs y'avait eune vielle hôtel. Un mio auprès les sentes dé travèrs la sente montait un mio raide et faîthait un var.

L'hôtel pathaîssait freunmée. La côtchiéthe 'tait peinte en blianc; à gauche y'avait un bel auve un vièr êcritchieau à l'entrée. Ch'tait l'êcritchieau d'la p'tite mênag'gie qu'nou soulait aver là. Y'avait des boulants partchis à gauche dans l'bel, et à drouaite y'avait un long bâtisse peint en blianc tchi soulait êt' eune partie d'la mênag'gie. Ch'tait un vièr bunkèr Allemand et y'avait d'la vielle graffitiéthie tch'avait 'té blianchie y'a eune pause. En r'gardant en arriéthe à l'entrée du bel, y'avait un bâtisse à drouaite auve un grand blianc pîngnon sus tchi j'pouvais vaie des vielles annonches peintes sus la muthâle avaû l's années, l'ieune sus l'aut', et achteu transpathentes et blianchies. Dans l'bel du bord des boulants, y'avait un nièr houmme mâté. Il avait d'la blianche peintuthe sus san corps, rîlyie coumme un zèbre, du temps d'la mênag'gie. Et y'avait étout eune Dgèrnésiaise en bannète d'îndgienne.

Rêvé l'20/3/2017

 

Viyiz étout:

 

Les Pages Jèrriaises