La vie d'un vier cheva,
Ch'est quiq'chose de nouvé chonna;
De ouir dire un' bête,
Qu'nou menn' par la tête,
Tout chein qu'il a fait,
Partout où-il a 'tè;
Comme il a 'tè servi,
Vendu, accatè, ou troqui.

En France je nâqui,
Pis en Jerri n'ou m'apporti;
J'avais diex-huit mais,
Aucun d'faut n'avais,
Mais pour du travas,
J'n'en connaissais pas;
J'avais 'te bein nouorri,
J'tais gros, et gras, et rpétilli.

Mais deuxs-trais jours oprès
Men maître me mint la longue grês;
Pour m'accouotumer,
I cmenchit à m'llier
Entre ses deux chvaux,
Qui étaient des pus biaux;
Et dans tout le canton
D'millieu nature i' n'y-avait pon.

Mais je fis bein men d'ver;
Men maître fut bein content d'mé;
J'étais bein nouorri,
Et pas trop cachi;
I' m' gardit seize ans;
J'n'avais pus grands dents;
Un biau jour i' m'vendit
A sen vaisin l'voleux d'mougnir.

J'n'y fus pas bein longtemps,
Mais j'y passi bein du bouan temps;
De bran et d'péture
J'avais plleine m'sure,
A-même touos les sacs,
I' n'y r'gardait pas;
J'étais stoffé, ma fé,
I' n'y avait rein d'trop bon pour mé.

Mais un jour i' m'troqui
Pour une mule, ov un boulangui;
J'n'y profiti pas,
Pus de course au pas;
I' fallait trotter,
Souvent galopper,
Cachi par des aviers,
Fallait que j'euss' la vie d'travers.

Mais sa mort étant v'nue,
I' fallut aver un' vendue;
Je fus adjugi
A un carossi;
Depis chu temps là
Je n'sis pus un chva;
J'sis maigre comme une hache;
L'vent n'a que d'm'envier bas quand j'marche.

A la fin i' m'vendit,
Pour des chiquettes aller cherchir,
Des feraill' et d's os,
Je n'ai pus de r'pos,
D'maison en maison,
Et pas l'ventre rond.
J'n'en ai pas pour longtemps,
Car ne v'la qu'j'ai près d'vingt-deux ans.

Ous pouvez bein jugir
D'touos les maux qu'un chva peut souffrir;
Je sais qu'i' y-en a
Qui en ont pus qu'chonna,
Mais tout iun dans l'autre,
Y-en a pas fort d'autres
Qui peuvent vouos montrer
Un pus fair êchantillon qu'mé.

J. L