J'tais en France sus la côte à l'entou d'Calais - ch'tait eune partie d'la côte qué j'n'avais janmais vîsité d'vant, auve des blianches falaises et des chapelles stchulptées dans des cottes dans les falaises. Les chapelles 'taient mangnifiques auve des côtchiéthes couleu d'crème stchulptées sus la susfache des falaises. Ches côtchiéthes 'taient d'un style Gothique extravagant, auve des pilièrs et des arches et des buts stchulptés mâtés tout l'tou - coumme des p'tites cathédrales. J'tais pouor vîsiter la pus grande et mangnifique dé ches chapelles, et dans la ville au haut d'la blianche falaise y'avait un casino, bâti dans un style néo-Gothique/Art Nouvé auve des tuiles céramiques sus l'lief. La côtchiéthe du casino tout coumme avait 'té modèrnîsée et y'avait un café ès bas auve eune d'vantuthe en plastique.
Voulant baithe dé tchi, j'entris dans l'café, tchi sembliait viède. Lé café 'tait s'pathé en difféthents appartéments bein êcliaithis, mais y'avait des tchaîses tch'embrontchaient l's us. J'pâssis au compteux, où'est qué j'fus atchilyi par les patrons, un janne coupl'ye - un janne moussieu et eune janne d'mouaîselle. À chein tch'i' pathaîssait y'avait un fliotchet d'monde en d'houors dans l'gardîn tchi s'adonnait sus les falaises. Lé solé lithait. La d'mouaîselle mé condisit dans l'gardîn. Y'avait des tabl'yes et des tchaîses où'est qu'lé monde prannaient lus thée, et y'avait eune mangnifique veue d'ilo l'long des falaises mais nou n'viyait pon hardi au liain viyant la bliâse. La d'mouaîselle, en ouïyant m'n accent, m'pâlait en chein tchi m'sembliait du Bréton.
Y'avait eune tabl'ye au but du gardîn sus l'bord d'la droque tch'avait la miyeu veue sus les falaises mais i' n'y'avait fis d'âme à chutte tabl'ye-là car la bliête 'tait si picotée d'fouaithe dé tchian qué nou n'ôsait pon s'n'appréchi.
Rêvé l'8 d'Dézembre 2010
Geraint Jennings
Viyiz étout: