Dans la bibliothèque unnivèrsitaithe y'avait des magâsîns en Nouormand auve des séthies d'sornettes en portraits. Lé tou des tabl'yes nou-s'avait arreuné des gâzettes dans l'aithe. Les gâzettes 'taient ouèrtes et avaient 'té souongneusement pliaichies comme si tchitchun avait clièrgi les tabl'yes pouor les netti et r'mué les gâzettes qué nou 'tait à êtudier.
Sus ieune des tabl'yes y'avait eune annonche enfrêmée auve un m'sage du Maît' du collège pouor d'mander létché des livres d'un comptabl'ye dé l'unnivèrsité 'tait l'miyeu. L'annonche avait un portrait tchi 'tait ofûche eune scène photographiée d'un film grée s'lon iun d'ches livres. Sus l'portrait y'avait deux mousses, un caton, et eune criatuthe tchi sembliait êt' un griffîn à tête dé cranne à long bé. Les mousses et l'caton sembliaient r'garder ou dgetter tchiquechose tchi s'pâssait l'avant à ieux dans l'film, mais l'griffîn avait gaffé la tête du caton dans san bé. Lé caton n'pathaîssait pon gêné mais dgettait tréjous.
Attabliés à ieune des tabl'yes, nou 'tait à distchuter des traductions et si ch'tait mus d'dêcrithe en Jèrriais dé tchi modèrne comme étant "d'chu siècl'ye" ou "d'achteu".
Rêvé l'20/8/2023
Viyiz étout: