Y'avait eune tabl'ye en bouais et un banc dans eune pièche ou sus un tchai l'avant à un bâtisse. Lé solé lithait et j'têmes pouor graie un dêjeuner en pliein air. J'avêmes c'mandé d's oeux d'Australie. Y'aviat eune boêtée d'oeux et j'têmes pouor fricachi l's oeux. L's oeux 'taient gris et grands coumme eune balle dé rugby mais sales et rudes auve des flias chîn et là dans la cruque. En prannant l's oeux dé d'dans la boête j'èrmèrtchis qu'un oeu trembliait et 'tait pouor êcliôthe. Dé d'dans l'oeu vînt eune autruche coumme un paon auve des plieunmes dé belles couleurs, bliues et vèrtes et picotées d'jaune.
Driéthe lé bâtisse y'avait un neu bâtisses où'est qu'i' y'avait eune conféthence entouor l'conmèrce et y'avait des politiciens et des gens d'conmèrce là. Mé, jé m'pronm'nais par l's allées et salles auve l'autruche, tchi r'sembliait pus à co à un paon, à ma braichie. Jé fliattais l'autruche tchi 'tait bein trantchil'ye et sembliait aimer la fliatt'tie. J'rencontris des gens pouor distchuter d'tchi, mais ch'tait un mio gênant d'aver à t'nîn un grand ouaîsé duthant les distchussions. Lé bâtisse 'tait un vièr bâtisses tch'avait 'té modèrnîsé et ch'tait l'ouvèrtuthe. Les muthâles avaient 'té r'grées atout des pannieaux en bouais d'un style cliâssique. Y'avait des bancs architectuthés au pouorportant des muthâles avaû l's allées et y'avait des gens assis sus.
En d'houors j'lâtchis l'ouaîsé tchi couothit par les bouais et gardîns l'tou du bâtisse parmi les gens. Il avait des longues gambes coumme eune autruche mais eune tête coumme un paon et eune longue coue d'paon. Ses plieunmes 'tait pus à co bliues coumme i' s'pathannait.
Rêvé l'29/8/2019
Viyiz étout: