Les Pages Jèrriaises

Un Rêve



Nou m'avait offèrt eune djobbe coumme désigneur d'jouettes dans eune mannifactuthe en Angliétèrre, et y'avait eune rêunnion quand mé et un aut' nouvieau empliyé d'la compangnie, j'rencontrînmes les aut's membres dé l'êtchipe.

Dans l'office, y'avait eune bein grand' tabl'ye et les gens 'taient assis à l'entou, mais mé, j'tais assis sus eune tchaîse sus rouôlettes et, coumme j'rêponnais ès tchestchions, jé c'menchis à rouôler par l'appartément.

Et pis j'allînmes couôrre dans les rues d'la ville, un aut' empliyé - pas l'nouvé - et mé. I' m'sembliait qué ch'tait eune belle matinnée d'Èrnouvé dans eune ville dans l'Sud d'l'Angliétèrre - y'avait des bouais dans les rues et l'solé r'lithait mais i' n'faîthait pon trop caud.

J'avais à décider si j'voulais atchilyi la djobbe ichîn en Angliétèrre ou la r'nonchi. J'pensais qué j'pouôrrais faithe la djobbe pouor tchiques mais, p't-êt' jusqu'à eune année avant d'tchitter.

J'têmes à couôrre dans nos c'mînses et cravates, et y'avait eune p'tite dgaîngue dé mousses tchi couothaient souôtre nous. J'pâlis ès mousses en Jèrriais, mais bein seu qu'i' n'mé comprannaient pon.

 

4/4/2003
 

Viyiz étout:

 

Les Pages Jèrriaises