Les Pages Jèrriaises

Un rêve

J'tais dans eune hôtel ou eune maîsonnée d'appartènements. Ch'tait un vièr bâtisse à trais êtages auve un p'tit ascenseu et eune bein êtraite montée. J'avais un appartènement à l'êtage à haut et j'voulais monter à m'n appartènement. J'tais sus la montée et l'vitchet d'l'ascenseu 'tait ouèrt mais y'avait deux femmes auve deux fil'yes et un tas d'bagages tchi 'taient sus la tripselle. J'décidis don d'faithe sèrvi la montée au traîsième êtage. Ch'est en tchi y'avait si p'tit d'run dans l'êtraite montée qu'la montée à haut avait 'té patchie. La montée 'tait pliée contre la muthâle et nou-s'éthait à haler la montée à seule fîn d'la dêplier. Y'avait un janne houmme en chèrge d'l'hôtel ou d'la maîson tchi m'dgèrnit dé n'faithe pon sèrvi la montée, mais j'décidis d'dêplier la montée tout coumme. La montée 'tait couèrte en vèrt tapis auve des balustrades en méaguinné ou tchi bouais d'même. J'halis sus l'bas d'la montée et ou s'dêplyit pouor couvri la tripselle - mais ou n'vînt pon tout bas au nivée du plianchais. J'mé l'vis sis un ais tchi 'tait sus la muthale à seule fîn d'monter sus l'preunmié d'gré. Et j'montis la montée et j'touônnis la carre pouor arriver à haut mais né v'là la monté tchi d'vînt hardi raide. Y'avait des bârrotîns en méta sus la tripselle d'à haut et j'gaffis les bârrotîns des deux bords du haut d'al montée mais la montée 'tait trop raide pouor mé à arriver sus la tripselle du traîsième êtage. Jé d'mandis d'l'aîgue. Lé janne houmme en chèrge né voulait pon m'aîdgi mais y'avait un aut' houmme sus la tripselle tchi vîn m'offri un co d'main. Épis l'houmme en chèrge changit d'avis pouor m'aîdgi étout, et i' m'halîtent à l'êtage.

Rêvé l'4/1/2019
 

Viyiz étout:

 

Les Pages Jèrriaises