Quand la beusse arrivit à l'aéroport, j'rêalîsis qu'ma valise né 'tait d'aut' à bord, ouaithe qué j'fûsse dgiantrément convaintchu qu'j'avais chèrgi tout tchi 'tait d'mêtchi pouor lé viage. Jé restis driéthe sus la beusse pouor chèrfouoilli tout chein tchi restait à bord d'la beusse, mais ma valise 'tait pon là entout. Ch'est en tchi j'n'avais rein pèrdu tout comme. Ma collègue éthait peu m'aîdgi mais oulle avait 'té hors à un concèrt ou à l'opétha où'est qu'oulle avait remporté un grand succès dans l'chant ouaithe qu'oulle eûsse 'té dans l'audienche. Nou li'avait d'mandé dé chanter et oulle avait fait mèrvelle. Et toute l'audienche à l'appliaudi.
Ch'est en tchi quand ou r'vînt au mûsée, ou 'tait embarrassée. Acouo habilyie dans sa grande et mangnifique rouoge robe en v'lous, brodée d'rouoge et d'or, ou n'avait pon l'temps d'vérifier la chèrgéthie d'bagages dans la beusse. Ou montit la montée en pièrre du mûsée à seule fîn dé s'dêchangi d'sa grande robe brodée dé tchi la traîne êmoûtchait des nouages dé ponsi. Et en pâssant nou la félicitit pour sa participâtion dans la chant'tie chutte séthée-là.
Les montées et tripselles en grannit dé d'dans l'mûsee 'taient couèrts dé sablion d'or et d'ponsi, comme si ch'tait un vièr bâtisse mais y'avait un tas d'va-et-veint tout comme. Y'avait étout dans l'mûsée eune colonnie d'bêtes tch'avaient drouait d'aller et v'nîn sus touos l's êtages sénon les bas. Y'avait des bêtes tchi marchaient manniéthement sus les dgéthets d'driéthe. Ché n'tait pon d's ourses ni des goril'yes, mais comme si ch'tait eune crouaîs'sie entre les deux. Tchiquefais y'en avait dg'ieux tchi voudrait d'valer ès bas; mais i' 'tait d'mêtchi d'lus dithe qué nânnîn. I' comprannaient assez bein l's înstructions, mais ches bêtes 'taient pus à co prînmitives. I' n'dang'laient pon d'amors mais ch'tait d'garder l'yi sus tout comme.
Quand j'tais pour monter des bas jusqu'au preunmié êtage, né v'là ieune d'ches bêtes tchi 'tait pouor d'valé jusqu'ès bas. Ch'tait eune vielle bête, lé pé couèrt dé ponsi et ès pliaies sus la faches du bord dé s'nètre, et étout sus l'corps du bord dé s'nêtre y'avait eune bliêsseûthe à l'estonma ou eune pliaie sus la côte dé s'nêtre (nou dithait qu'la bête avait 'té en bastaude au temps pâssé et avait 'té avrônée dans la litte tch'avait laîssi des mèrques sus l'corps)
Si ch'tait eune manniéthe dé goril'ye ou d'ourse, la bête mé pâssit sus la tripselle entre lé preunmié êtage et les bas. Et viyant qu'ou n'tait pon allouée dé d'valer ès bas, quand ou m'êpyit, ou ramontit. J'lî dis "Bouônjour." Ou m'rêponnit du mus qu'ou pouvait: "Bouônjour."
J'fus ravi qu'la bête 'tait avanchi assez d'honner d'même: "Bouônjour", mais v'là qu'la bête ourse/goril'ye amontit. Sus san pé, y'avait du sablion d'or ou du ponsi, et ou ramontit douochement la montée à pèrte dé veue.
Rêvé l'5/8/2022
Viyiz étout: