J'tais à un studgo d'cinnéma où'est qu'nou filmait un film musical. La strade 'tait ênorme auve eune partie en d'houors épis l'pîngnon du grand bâtisse 'tait ouèrt et la strade continnuait par dédans. Dans l'but d'la strade tchi 'tait en d'houors les trais êtailes du film 'taient à pratitchi la preunmié chanson du film. Ches chant'rêsses 'taient deux des pus belles et fanmeuses actrices et la traîsième 'tait eune grande êtaile dé pop. I' 'taient touos les trais habilyies en longs fros êlégants et êtînch'lants. La chanson 'tait hardi longue par cause qué l's actrices întroduîsaient touos les cheins tchi travaillaient sus l'film. I' n'y'éthait pon d'crédits à la fîn du film, mais touos les noms s'saient chantés au c'menchement. L's actrices pâssîtent lé tou d'la strade pouor mentionner en chanson toute l'êtchipe dé filméthie et l's aut's.
Épis l's actrices fûtent à la grève. La grève 'tait hardi longue, eune lisiéthe dé sablion à pèrde dé veue. Y'avait des p'tites villes et villages tout l'long d'la côte auve des tchais à pliaîsi en r'nonchiâtion dans la mé l'avant ès villes. Sus l'sablion y'avait des huttes en d'lacres. Les actrices aimaient les huttes et dansaient entre les mâtants tchi restaient. Lé solé 'tait bas et lithait entre les stchelettes en bouais des huttes et illeunminnait les fros d's actrices.
J'avais acaté un vièr livre et entre les pages j'avais trouvé eune carte postale d'y'a bein d's années auve un m'sage tchi racontait comme tchi qu'l'envyeux avait vîsité eune maîson et entré sans învitâtion. J'èrconnus la maîson et j'y fus san învitâtion. La maîson 'tait grande et dans un grand gardîn dans eune vallée. J'ouvris eune blianche porte sans taper - ché n'tait pon la grande porte - et j'entris sans învitâtion. Un co entré, j'annonchis ma présence ès propriêtaithes. La danme 'tait ès bas et l'moussieu 'tait à haut. I' 'taient manniéthement jannes. J'explyitchis la carte postale et i' 'taient hardi întérêssis et offrîtent dé m'mouontrer la maîson. Ou 'tait bein vielle auve des difféthentes parties bâties à des difféthentes êpoques. Eune partie d'la maîson 'tait confortabl'ye et avait 'té modèrnîsé mais y'avait des parties bein historique. Eune partie du plianchais ès bas 'tait pavée en galots. Ché n'tait pon confortabl'ye à marchi sus. Au mitan d'la maîson y'avait eune grande haute salle auve un pliafond en votte. Y'avait d's êtraits pilièrs contre les muthâles comme des côtes tchi 'tait couèrts dé p'tites tuiles couleuthées coumme eune mosaïque. Ch'ta un mio coumme eune chapelle mais les muthâles 'taient pliâtrées en chînment. Ch'tait coumme eune vielle grange tch'avait 'té încorpouothée dans la maîson dans l'pâssé épis convèrtie en bunkèr par l's Allemands duthant l'Otchupâtion et dêcothée auprès. Les propriêtaithes m'învitîtent dé rester pus longtemps mais j'dis qué j'avais d'aut's choses à faithe.
Rêvé l'20/1/2019
Viyiz étout: