J'tais sus un hydrodrisseux dans la Baie d'Saint Aubîn. L'hydrodrisseux s'trouvait dans l'mitan d'rotchièrs et l'cap'taine avait à fliotter précaûcieûthement l'tou des rotchièrs à seule fîn d'entrer dans la caûchie d'Saint Aubîn.
Un co l'baté amathé, i' 'tait d'mêtchi d'chèrgi du mangi, sustout un tas d'pains. Mé, j'aîdgid à porter des grandes poutchies d'flieu ava les d'grés d'la caûchie pouor lé boulandgi tch'avait à boulandgi l'pain.
J'têmes dans eune grande salle où'est qu'nou 'tait à sèrvi du fricot Chinnouais. J'tais attablié acanté eune belle Chinnouaise. J'nos entré-pâlînmes et j'tais entchéthinné d'li, mais oulle avait à tchitter d'vant d'aver finni l'èrpas, pouor tchique raîson qu'ou n'vaoulait pon explyitchi.
Lé sé, j'tais à graie des vîsagiéthes pouor eune fête. J'avais fait eune manniéthe dé grise longue fache dé tchi l's ièrs et la bouoche 'taient à haut dans l'front. D'aut' monde 'taient là pouor graie des vîsagiéthes. J'mîns ma vîsagiéthe et jé n'tais pon seux si j'pouôrrais vaie hors dé driéthe mais les creux pouor m's ièrs 'taient pliaichis bein assez pouor qué j'pûsse vaie l'travèrs.
Rêvé l'3/1/2023
Viyiz étout: