Y'avait des vièrs ascenseurs en bouais dans l'grand bâtisse et j'éspéthêmes pouor monter. J'avais grée eune manniéthe dé pistolet à cliute tchi dêgôlait d'la bande dé blianche cliute pouor faithe des r'pathes à haut.
Lé Gouvèrneux avait sa résidence à haut et y'avait eune réception officielle ès bas. J'eus à înviter des danmes à monter à haut pa'ce qué la Danme du Gouvèrneux 'tait là pouor l's èrchéver.
Y'avait eune arînmée Mecklésen (prononchi Mé-qu'lé-sènne) qué nou chantait.
Y'avait un rapport sus un magâsîn dé mode et d'style mais la typographie du Jèrriais avait 'té avraûnée d'manniéthé qué tout l'restant d's articl'yes siêthantes vînssent dé pus en pus hortes dé lague lé tou des portraits et qu'y'eûsse des bliancs creux sus l'papi et chenna vînt piéthe en liêthant pouor la fîn du magâsîn. Épis nou s'en fut învestidgi mais coumme nou-s'allait l'paysage tout l'tou v'nait avraûné étout coumme dans l'magâsîn auve des bliancs creux dans l'ciel. Nou r'vînt don.
J'rencontris eune vielle danme dans la rue en Ville tchi boulait eune cârrosse à mousses. J'criyais qué j'la r'connaîssais mais ou n'tait pon la cheinne qué j'criyais r'connaître. Tout coumme ou m'èrconnut et m'hêlit par man nom mais j'm'en fus et par la carre né v'là qu'ou 'tait la danme qué j'connaîssais.
Rêvé l'6/10/2018
Viyiz étout: