La police 'tait souotre mé et j'tais dans un par endrait un long bâtisse en brique tchi sembliait êt' la stâtion d'police. Jé m'tais muchi souos des bouais dans l'par à r'garder l'bâtisse. J'tais à porter deux grandes boêtes, ieune souos châque bras, et j'm'accliutchis souos les bouais. V'là tchi vînt trottîn-trottant avaû eune sente lé travèrs du par eune vaque robotique. Chutte bête mécannique avait un corps pus à co cârré, grée d'boêtes en méta et pliastique dans eune stchelette en acyi. Ses gambes 'taient coumme des bâtons sauteurs "pogo" et la robo-vaque avanchait en saûticotant coumme eune ênorme jouette. La robo-vaque s'aransit et touônnit sa tête métallique d'un bord pouor èrgarder un bathi à tés. Ses ièrs lithaient rouoges coumme ou scannait l'bathi. Épis ou vînt auprès d'la bouaîs'sie où'est qué j'tais muchi. La robo-vaque sé mâtit endrait mé à scanner la bouaîs'sie atout ses rouoges ièrs. Ou 'tait eune chèrch'rêsse êlectronnique d'la police, mais ou n'sembliait pon m'aver r'mèrtchi. Épis né v'là la police tch'arrivîtent. I' pâssîtent au pouorportant d'la bouaîs'sie. La tchêve officiéthe s'aransit endrait mé pouor êpier dans les bouais. Mais acouo eune fais ou n'sembliait pon m'èrmèrtchi. Les policemainnes lus en r'fûdrent, eune grande dgaîngue dg'ieux, mais les dreins à lus cârrer 'taient eune d'mié-douzaine dé jannes gens, des hardelles et des hardgieaux. Ches'-chîn r'mèrtchîtent tchiquechose souos les bouais où'est qué j'tais muchi auve mes boêtes. I' lus r'touônnîtent pouor învestidgi, et à la fîn m'èrconnûtent.
Épis j'entrînmes dans eune maîson. Touos l's appartènements avaient 'té fraîchement peints en des difféthentes couleurs bein cliaithes. Y'avait des grand taques dé couleu, des cârrés et des bêlongs, sus les muthâles. Ch'tait eune maîson dans tchi qu'i' y'avait ieu un tas d'meurtres et les cadâvres avaient 'té muchis tchiquebord dans la maîson. Ch'tait d'les dêmuchi. Mais y'avait-i' eune odeu! L'odeu d'la peintuthe né muchait pon l'odeu d'pouôrrituthe tch'înfectait les sept b'lettes et donner l'tchoeu d'vômi. J'dis qué né v'là pouortchi qu'nou-s'êtoupe ses nâsil'yes atout d'la vaselinne.
Rêvé l'28/2/2016
Viyiz étout: