Nou tchithiait des grandes frêmes dans eune vainne. Lé j'va tchi halait la vainne 'tait brun et ênorme - dans les deux-trais fais pus haut qu'la vainne. Les frêmes 'taient mâtées et patchies dans l'corps d'la vainne, et l'tchéth'tchi 'tait assis sus un couôssi sus l'haut des frêmes pouor arriver à la hauteu du j'va. V'là tchi 'tait la couôteunme dans chu pays-là.
La vainne 'tait vielle. Les frêmes èrmuaient et i' 'tait d'mêtchi d's'arrêter à seule fîn d'les r'amather car autrément lé cacheux pouôrrait tchaie dé d'ssus san couôssi. J'eus à rarreunner les frêmes dans la vainne et nou vînt m'aîdgi.
J'arrivis à la fîn à la cathédrale pouor la grande fête. Y'avait un tas d'monde. La cathédrale 'tait en êtchèrre: y'avait la vielle partie tchi 'tait raîque eune salle coumme eune chapelle et tchi n'tait pon hardi grande, mais y'avait des stchulptuthes et d's ornéments. En driéthe à dêtre y'avait eune p'tite montée d'eune d'mié-douzaine dé d'grés tchi m'nait à l'aut' partie d'la cathédrale tchi faîthait êtchèrre auve la vielle partie. La neuve partie d'la cathédrale 'tait bein pus haute et grande qu'la vielle et 'tait richement êcliaithie. J'trouvis eune pliaiche sus un banc en driéthe d'la vielle partie, dans la carre d'l'êtchèrre, endrait l'auté d'la vielle cathédrale, mais en m'èrtouônnant à dêtre jé pouvais r'garder amont les d'grés dans la neuve partie et l'travèrs d'l'arche jé viyais l'êvêque tchi 'tait habilyi dans toutes ses robes pouor la fête. L'êvêque 'tait grand auve eune grôsse fache souôriante et eune tenvre grise barbe l'tou d'sa mâchouaile.
Rêvé l'4/3/2011
Geraint Jennings
Viyiz étout: