|
Man pouôre vier bianc bidet n'est pûs. Il a crevé - les blinds sont bas. Toute la famillye en est êmue, D'pensé que nou n'le r'verra pas. Y'à vingt-ching ans que j'l'accatit, Y v'nait tout drait d'la Normandie, La Merrienne en eut la peppie. Comme ou s'faisait: "Tu perds la tête! Des trente-deux louis pour une telle bête." Mais ou s'trompait, car de ma vie J'n'ai jamais fait un miyeu jour, Pour d's'années 'l'Joe nos a servis, Sans autchune pliâinte ou cri d'au s'cours. Trantchille, honnête et tréjous prêt, Et bouan d'collyi dans autchune graie. Dans l'querre y 'tait si remplyi d'feu, Qu'à hallé d'sus j'suais comme un boeu, Et dans l'hernais fallait marchi, Pour se gardé à côté d'ly. Dans la saison chent-vingt cabots, Ch'tait rain pour un bidet comme Joe. Quand mé et l'y j'allions au vraic, Le Joe y s'sait r'venu tout seu. A ramonté y'avait du trait, Mais y 'tait tréjous d'si bouon tcheu, Dans les tchethièthes y n'se trompait Jamais, et pourtant j'l'ai fait mé. Y 'tait docile comme un êfant, Mais n'se laissait pas capuchi. Le fouet l'faisait grinchi les dents, Y v'nait comme un tchan enragi. Sûs la route nou pouvait être seûx Que n'y'éthait rain tchi l'y f'thait peux: Ni train, ni môteur, ni mathes d'l'iau, Rain n'le dêrangeait, not' vier Joe. Nul n'a yeu miyeu serviteur, Nul n'a yeu pûs fidèle amin. Quand l'brit couothit - "Le Joe se meurt"! Siez nous tout l'monde plieuthait d'chagrin. Ch'tait une colique tchi l'emportit. Dans mains d'deux heuthes y' 'tait fini. Le jour d'après nou l'enterrit L'inscription liet: "Joe dors ici." A bétôt, Joe, de l'autre côté J'te r'connaîtrait, fait-t'en bain seûx, Attend un mio, et n'ait pas d'peux, Ensemblyes j'îthons nos prom'né. Ph'lip dé Portinfé
|
Viyiz étout: