Les Pages Jèrriaises

Un rêve

J'tais pouor chanter d'l'opétha sus eune strade au grand air. Y'avait eune grande audienche sus la bliête l'avant à mé, mais jé n'pouvais pon c'menchi la chant'tie d'l'opétha sans aver eune femme sus la strade à tchi chanter. I' n'y'avait pon d'chant'rêsse pouor m'aîdgi. J'avais à graie eune manniéthe dé bouonnefemme ou êmânue à tchi chanter et l'audienche avait à espéthe entréchîn qué j'ag'vîsse man travas sus la strade. Jé prîns eune barre dé fé et la mâtis sus la strade atotée atout des livres, épis j'dessinnis eune fache sus eune fielle dêchithée d'papi atout un crèyon. Chenna m'prînt eune bouonne pause mais l'audienche né s'embliait pon en êt' gênée. J'cliutis la fache sus la barre dé fé et né v'là la héroïnne dé l'opétha et j'chantis lé c'menchement dé l'opétha à ch't' êmânue. Auprès chenna j'm'en fus et quand j'èrvîns pouor la préchaine scène j'tais gêné pa'ce qué jé n'tais pon seux des patholes à v'nîn. Mais n'y'avait pon d'hannicroche: l'opétha continnuit auve eune d'mié-douzaine dé femmes, habilyies en grandes robes en un tas d'couleurs cliaithes auve des ribans, tchi chantaient sus la bliête et coumme i' chantaient les patholes m'èrv'naient. Épis l'opétha continnuit en procêssion par la Ville - les chant'rêsses à la tête et mé et toute l'audienche en driéthe. Jé d'valînmes la David Place, et les chant'rêsses chantaient tréjous. Y'avait des décothâthions haûlîndgies par les c'mîns. Y'avait eune grande hôtel à drouaite et coumme j'la pâssêmes, j'èrmèrtchis des couleurs nâtionnales dans la d'vantuthe - des trais-couleurs dé difféthents pays entouortilyies d'êtentes d'êtînchelle en or et couleuthée d'difféthentes couleurs.

Rêvé l'17 dé Févri
 

Viyiz étout:

 

Les Pages Jèrriaises