J'tais à pédaler sus ma bike, et j'eus un affit d'aller pédaler en Nouvelle Zélande. J'y'allis en avion. Dans la grande ville y'avait d'la publyicité en néon. J'décidis d'aller pédaler à la campangne. Lé paysage 'tait pliat. Lé solé lithait et y'avait des c'mîns à bike bordés d'bouais. Y'avait des hardelles à longs g'veux à pédaler par les c'mîns. Les c'mîns n'taient pon draits, et par bordée i' 'taient tathés ou en hèrbe. À eune pliaiche y'avait eune grande machinne à dêfoui à r'graie eune partie du c'mîn en fîn gravi, tout rât'lé coumme un gardîn Japonnais. L's ouvrièrs mé laîssit pâsser sus l'gravi. Les c'mîns 'taient pliats excepté à un coupl'ye d'endrait où'est qu'i' y'avait eune droque coumme un d'gré. J'fus oblyigi d'êtreindre mes chabots don à seule fîn dé n'pon m'drotchi à ches bords-là. Auprès d'la pédal'lie, j'arrivis dans eune vallée rotcheuse tchi 'tait remplyie dé p'tits bâtisses coumme des chapelles, des villas, des pavillons... I' 'taient bâtis en brique et en rouoge et néthe pièrres dans des styles gothiques et modèrnes. Stchulptées sus ches bâtisses, y'avait d's înscriptions en êtranges lettres et sŷmboles coumme des chorchéthons. Sus un bâtisse et rouoge et blianche brique y'avait eune vielle pliaque du dgiêx-neuvième siècl'ye en lettres gothiques tch'explyitchait la graiethie d'ches bâtisses par un moussieu tchi 'tait l'maire d'la ville ou tchique aut' pèrsonnage. Sus un aut' bâtisse, pus à co rond, y'avait eune grise ronde pliaque modèrne tch'explyitchait les bâtisses. Lé moussieu tch'avait bâti ches bâtisses s'întérêssait dans la chorchel'lie.
Au d'ssus des p'tits bâtisses, sus les côtes rotcheuses d'la vallée, y'avait eune ville dé vièrs bâtisses dé style Baroque coumme si ch'tait eune ville Italienne mais ch'tait bizarre d'vaie eune itelle ville en Nouvelle Zélande.
Rêvé l'19/6/2013
Viyiz étout: