Les Pages Jèrriaises

Un rêve

J'tais dans eune grande ville au Nord d'l'Angliétèrre. Ch'tait ofûche Manchêtre, mais jé n'tais pon dans l'centre ville. J'tais dans un vaîthinné résidentiel ès bords d'la ville. Lé solé lithait et j'allînmes avaû eune rue trantchil'ye bordée d'maîsons, d'bouais et d'gardîns. Au but d'la rue y'avait un par auve tout plien d'bliête et des bouais.

À s'nêtre au but d'la rue y'avait eune églyise. L'églyise 'tait en brique et d'style Néo-Gothique, et nou-s'éthait dit typiquement Victorienne. Mais lé d'houors 'tait couèrt dé grandes pliaques en pot'tie, dans les mètre et d'mie ou deux mètres cârrés. Ches belles pliaques ou tuiles céranmiques 'taient couleuthées auve un blianc fond sus tchi y'avait d's anges agenouoillis, un ange par pliaque, entouothés d'vèrduthe entouortilyie.

L'travèrs du but d'la rue y'avait d's arches en fé tordu. L's arches allaient d'l'églyise à s'nêtre à la maîson endrait à dêtre. L's arches formaient l'entrée du par. Lé fé 'tait nièr et l'arches 'taient acouo eune fais Néo-Gothiques. Sus les colonnes entre les arches (y'en avait eune d'mié douzaine), y'avait des stchulptuthes dé saints, toutes couleuthées en blianc et or et bliu et rouoge et d'aut's couleurs sans doute.

J'pâssînmes souos l's arches (jé n'sais pon acanté tchi qué j'tais à m'pronm'ner) et j'arrivînmes dans l'par. L'hèrbe 'tait vèrte mais y'avait des creux où'est la jaune tèrre s'mouontrait par des bords. L'entrée d'l'églyise 'tait là dans l'par; lé porta s'adonnait sus l'par et les portes 'taient ouèrtes et l'églyise 'tait néthe par dédans. D's êmânues sortaient du porta d'l'églyises. Ch'tait des gens tchi portaient des costeunmes coumme nou-s'avait à la Batâle dé Flieurs, des "Grôsses Têtes". Ch'tait des grandes vîsagiéthes tchi couvraient tout l'corps des gens, dans les trais mètres dé haut. I' sembliait êt' grée en papi miâtchi, bein grôssiéthement et à la grôsse ieau. Les faches 'taient laies et toutes blianches. Les costeunmes 'taient des vèrsions des saints coumme i' 'taient stchulptés sus les arches, mais quâsiment des parodies. Les costeunmes sans doute 'taient b'sants car les gens craûlaient en avanchant dans l'par. J'èrgardînmes coumme i' pâssaient en sortant d'l'églyise et entrant dans l'par. Dans l'solé ches blianches faches lithaient tchuthieusement coumme i' faîthaient des grîngnes.

Rêvé au mais d'Mar 2014

 

Viyiz étout:

 

Les Pages Jèrriaises