Les Pages Jèrriaises

Un rêve

J'èrchus eune lettre, êcrite à la main, adréchie à l'Associâtion Êcôssaise du Cricket. J'allis siez l'avocat dans la Rue ès Dentistes tchi s'en d'mentait d's affaithes d'l'associâtion à seule fîn d'explyitchi qu'la lettre avait fait un var. Dans l'office des avocats tout 'tait à la vielle faichon: des p'tits appartéments auves des vielles tabl'yes et des mouochés d'livres et dôssièrs. Y'avait un fliotchet d'monde. J'tâchis d'explyitchi la lettre et la d'livrer mais nou m'dit d'espéther. Dans l'office y'avait eune êtchipe dé photographiéthe étout auve un tchéthette sus tchi y'avait lus êtchipement et tripot. I' 'taient à photographier l'office. Nou m'démandit dé monter la montée vaie l'avocat en chèrge. V'là tchi m'sembliait trop pouor eune sîmpl'ye lettre. J'avais eune p'tite poumme à la main quand j'rencontris l'grand d's avocats dans s'n office tchi 'tait grande et s'adonnait sus un gardîn à poummièrs. L'avocat m'dit que les poummes 'taient bouonnes. J'lî mouontris la lettre. I' mé d'mandit si j'avais liu la lettre. J'dis qu'nânnîn et qu'j'avais veu qu'la lettre 'tait s'posêment pouor l'Associâtion Êcôssaise du Cricket et qu'j'avais don décidé d'la pâsser ès cheins ayant drouait. L'avocat m'consilyit d'garder la lettre car y'éthait d'l'avantage pouor mé. Il avait eune pétite vèrte poumme étout.

L'êtchipe dé photographiéthie 'tait dans la Grand' Rue auve lus tchéthette. Ch'tait la séthée et les veues êcliaithaient lé d'dans des banques, mais i' n'y'avait pèrsonne dans les bâtisses. Les photographièrs halaient des portraits des banques. Nou-s'ouvrit les ridgieaux ès f'nêt's dans les banques à seule fîn qu'nou pûsse photographier l'travèrs des f'nêt's dé d'houors. D'un co les veues dans les banques d'vîntent êgaluantes et êcliaithîtent toute la rue et nou viyait cliaithement tout chein qu'i' y'avait dans les banques. Lé monde dans la rue fûtent ravis et les photographièrs prîntent des photos.

Rêvé l'6/4/2011
Geraint Jennings

 

Viyiz étout:

Les Pages Jèrriaises