J'tais dans un par. Y'avait d'la bliête, des partèrres auve des flieurs et des bouais. À s'nêtre, y'avait eune muthâle, et dans la carre y'avait des gens. J'èrconnus iun d's hoummes - ch'tait un danseux Angliais. Et j'rêalisis qu'i' y'étha d'la dans'sie dans l'par - du ballet. Les danseurs 'taient habilyis dans des habits ordinnaithe, des braies et des câsaques et des corsets à capuchon, et la dans'sie 'tait s'posée d'êt' împromptu. D'un affit, les danseurs lanchîtent lus danse, d'la danse modèrne. I' sautaient, i' rouolaient dans les partèrres, et couothaient l'tou des bouais en faîthant des teurs. Coumme la dans'sie continnuait l'travèrs du par, des spectateurs lus assembliaient pouor dgetter la présentâtion. Lé solé lithait. Nou-s'arrivit à la grève, et ch'fut là qu'les autorités arrêtîtent la dans'sie. I' 'tait d'mêtchi d'aver la pèrmission pouor la dans'sie dans l'par, et nou n'avait pon d'mandé la pèrmission. Y'avait un baté sus la grève.
J'tchittis la grève acanté eune danme, et j'marchînmes amont la montée d'la grève. Y'avait eune ruette pavée tchi m'nait amont l'mont. Y'avait des vielles maîsons des deux bords. Du haut du mont jé d'valînmes dans eune grande pièche. Ch'tait eune grande ville. L'architectuthe 'tait en rouoges et jaunes briques et pus à co Allemande, ou ofûche Suisse. À dêtre, y'avait eune églyise gothique en brique, mais modèrne. La côtchiéthe 'tait en trian auve des p'tit parapieaux. À s'nêtre d'l'égyise 'tait l'cliochi - eune haute ronde tou en briques en bandes dé rouoge et jaune, ou crème. Au haut du cliochi y'avait eune coupole d'ouognon. Endrait l'églyise, y'avait un haut bâtisse en briques tchi 'tait un hôtel. À l'avant d'nous, à la brècque d'la grande pièche du bord d'l'églyise et endrait l'hôtel, y'avait la stâtion. Lé mitan d'la grande pièche 'tait la crouaîs'sie d'un tas d'quémîns d'tramouais. Des tramouais pâssaient et r'pâssaient tout l'temps. J'explyitchis à la danme qué tout chu quartchi d'la ville avait 'té bombardé et r'bâti.
Mé et la danme, j'voulêmes crouaîsi jusqu'à la stâtion, mais ché n'tait pon d'tchi aîsi. Nou fut oblyigi d'sauter par les lîngnes à seule fIn d'n'êt' pon êglianmi par un tramouais (i' pâssaient bein quédaine). Lé d'vant des tramouais 'tait en formé dé boulet, et i' suffliaient et ronnaient. J'mênagis, mé, d'crouaîsi touos les c'mîns d'tramouais à tchiquechose près, mais j'eus à sauter pouor m'êcapper d'eune rouoge vaituthe d'eune ièrre d'l'aut' bord. Quand j'arrivis sus l'trottouaithe d'la stâtion, j'fus hèlé par un gardgien en bliue câsaque et bliue teunette tchi voulait m'naûmier pouor aver crouaîsi la rue entre les tramouais. Il avait un livret dé formes et griffouoillait d'dans pouor faithe l'amende, mais i' bargouêchait et jé n'lé comprannait pon. J'lî dis qu'i' fallait m'pâler en Français et chenna dans ma bouonne ouothelle, mais i' r'bargouêchit acouo et jé n'mênagis pon à comprendre s'n explyicâtion.
Geraint Jennings
27/1/2010
Viyiz étout: