J'tais pouor êcrithe eune articl'ye entouor lé chînm'tchiéthe dé la caûchie. N'y'avait pon d'accès au chînm'tchiéthe pouor lé publyi. Nou viyait l'ancienne chapelle du chînm'tchiéthe en pâssant par la route. La chapelle 'tait en r'nonchiâtion et ch'tait raîque lé cliochi qu'nou pouvait vaie driéthe les bârrotîns tch'entouothaient l'chînm'tchiéthe. J'entris dans l'chînm'tchiéthe, ayant trouvé eune entrée. Y'avait des pièrres 'chîn et là parmi des d'lacres épis jé m'dêhalis dans l'chînm'tchiéthe même tchi 'tait pus grand qu'i' sembliait dé d'houors. Ch'tait eune vielle cârriéthe auve lé rotchi tout l'tou et au mitan d'la bliête auve les sépultuthes patchies ensembl'ye en rangies auve des couronnes dé flieurs sus. En driéthe y'avait comme des bunkèrs en chînment tchi 'taient l's offices des ouvrièrs dé caûchie. Lé chînment avait 'tait peintuthé y'a bein d's années en des difféthentes couleurs, mais achteu v'là tchi p'lait. Nou m'atchilyit et j'explyitchis qué j'tais pouor êcrithe entouor l'histouaithe du chînm'tchiéthe et nou m'offrit du thée. Pus liain y'avait un amalgamot dé pièrres înscrites, dé vièr monuments et tout pêque-mêle et j'pus distîndgi l's êqu'sîns d'un obélisque coêffi d'eune stulptuthe en fé teurt d'un aigl'ye à doubl'ye tête. Ch'tait chein tchi restait d'un monument tchi ramémouoaithait la vîsite d'un empéreu Russe.
Rêvé l'6/9/2022
Viyiz étout: