Moussieu l'Editeu,
Nous en ouait de toutes les sortes entouôre la Bataille de Flieurs. Y'en a tch'y disent que l'spéctaclye tait miyeu qu'l'année passée, et d'autres tch'y disent le contraithe. Mais tous sont d'accord que l'Comité a fait tchique bardgin avec la Providence, tch'y lûs donnit un si biau jour, comme de couôtume.
La Merrienne est d'idée que les membres du Comité sont d'hommes avec des caractèthes si irréprochablyes que l'génie tch'y règlye le temps n'voudrait pas lûs faithe du ma, mais mé, tch'en connait yun ou deux, j'n'en crai rain, car de chein qu'j'ai veu d'lûs actions y n'valent pas mûs qu'tout l'restant, et y'en a même un couplye tch'ont tait veus dans d'aubérges quant ils éthaient deu être siez yeux à gardé compagnie à lûs femmes. quand j'dis chonna à la Merrienne, ou raipond que n'y'a pas d'ma à béthe un vèrre de limonade, et qu'les femmes sont probablyement à tchique meeting de chu Women's Institute. Pour dithe vrai, y'a d's'occâsions quand oulle est bête comme ses pids, la bouonnefemme.
Ach'teu hier au sé, ayant distchuté la Bataille, j'obsérvit que j'espethais qu'nous éthait biau temps étout Lundi, et ou voulut savé pourtchi.
"Ch'est l'preumié Lundi du mais d'Août," j'l'y dit, "et chu jour-là est tréjous un Bank Holiday. Chen tchi nos faut ch'est du biau solé pour les courses ès Rouoges Maisons, car, seux et cértain qu'y'étha une foule de monde là, pourvu que l'temps s'comporte."
"Oh, sans doute," ou s'fit, "y'a tréjous du monde qu'ont du temps et des sous à perdre. quant à mé, si tchiyait d'la plyie du matin au sé, j'n'en plieuth'thais pas."
En l'entendant dithe chonna, Moussieu, je qu'menchit à m'mârri, et j'l'y dit qu'ou dév'thait avé grand' honte de pâslé d'même.
"Parsque tu n'aime pas les courses," j'l'y dit sévèthement, tu voudrais déprivé des milles pérsonnes d'un jour de pliaisi. Vraiement, Merrienne, je n'te comprends pas. tchi ma qu't'y vais, après tout?"
"J'y'en vait hardi," ou raiponnit: "A qu'menchi, crai-tu qu'ch'est juste de faithe chais pouôres chevaux gallopé et gallopé quand y voudraient être à l'êtablye à mangi du foin ou à-banon dans les clios à mangi d'herbe?"
"V'la tchi n'fait autchun tort ès bidets," j'l'y dit, "et tu m'pérmett'ra de t'ram'né à la memouaithe les chents faits qu'j'ai yeu à att'lé notre vier Bob, tch'éthait voulu se r'pôsé, pour allé t'tchithié ichin et là, même des milles au lien."
"Ch'n'est pas du tout la même chose," ou dit, "viyant qu'ou n'pouvait pas raipondre à m'n' ardgûment. Quand j'avons tait nos prom'né ch'tait tout à la douoche et souvent au p'tit pas. et au mains je n'dêpensaimes pas des sous follement à gagi avec des fripons comme nou m'a dit qu'y'en a trèjous une dgaingue à chais courses."
"Nou n'est pas forchi d'gagi si nou n'veur pas," j'l'y dit. "Et y'a tréjous une chance de gagni tchiques hérpins. J'me r'souveins qu'ès courses de Saint-Ou, une bordèe, j'éthais tait chinq ch'lins en pouchétte si l'voleux avec tch'y qu'j'avais gagi n'avait pas fichi sans camp sans dithe mot à pèrsonne."
"Et y'a trais ans," ou dit, "quand j'fut bête assez de t'dithe que tu pouvais y'allé, et ocquo pûs bête de t'donné djais ch'lins tu r'vint sans l'sou. As-tu r'oublié chonna?"
"Ch'tait la faute de tan n'veu, le Joe," j'l'y dit. "Y m'asseûthit qu'chu ch'va-là pouvait arrêté dans l'mitan d'la course pour mangi un brin d'herbe, et ocquo gagni pas trais ou quatre pérques, mais je séthai mûs chutte fais?"
La Merrienne me r'gardit en fache. "Et tchèsque tu veur dithe par chonna?" ou d'mandit. "As-tu par chance l'idée dans ta vieille tête que tu t'en vas ès Tchénnevais Lundi?"
"Eh bein, oui, Merrienne," j'l'y dit. "Ch'est un jour de vacance, et l'air des Tchénnevais me f'tha du bein. Je m'trouve un mio faillyi chais jours. J'ne s'sait pas tard à r'venin."
"Bein seux qu'tu ne s'sas pas tard à r'venin," ou dit, "car tu n'îthas pas. Si tu t'trouve faillyi, fais un mio d'travas pour un change. Y'a longtemps qu'tu n'as pas fait un jour de houéttage, sans paslé d'frouque ou bêque, et il est grand temps qu'tu t'y r'métte. Allons, n'en v'la assez, met l'ticlye sûs l'feu, car j'veur une tâsse de tais."
Ph'lip
Les Chroniques de Jersey 1/8/1953
Viyiz étout: