Un Rêve

J'tais pouor aller à l'Hôpita; j'avais un appouaintement. Nou mé d'mandit si ch'tait pouor d'l'avis ou pouor eune opéthâtion et mé, jé n'savais pon. Nou-s'avait ridgi un nouvieau traitement: en lavant ma chai atout du vinnaigre, v'là tchi f'thait pus vîsibl'ye lé ma et nou s'sait capabl'ye d'en haler l'ma pus aîsiment. J'prîns un taxi pouor aller à m'n appouaintement, mais jé n'feûnmes pon à l'Hôpita. Lé cacheux d'taxi savait lé c'mîn à m'n appouaintement mus qu'mé. I' cachait hors la Ville. J'criyais qué ch'tait chèrchi la Ville par l'Vièr Châté mais y'avait un tas d'trafi par les c'mîns et i' cachit l'taxi à la campangne. J'arrivînmes au pid d'eune raide ruette à la Trinn'té. La ruette montait entre des bouaîs'sies des deux bords. L'air 'tait frais. Amont la ruette, y'avait des drôles dé rotchièrs dans la vaie: i' 'taient apliatis et arrondis, coumme des jaunes d'oeux fricachis. I' 'taient d'difféthentes grandeurs; des p'tits et des grands coumme eune assiette, breunâtres et d'couleu d'myi. À mié-c'mîn amont l'mont y'avait eune dgiêxaine dé monde dans la ruette et né v'là eune vielle caûminne en grannit auve un grand êcritchieau en bliu sus blianc tch'annonchait qué ch'tait eune clyinnique médicale. L'avant à la caûminne y'avait un p'tit bel pavé et eun p'tite bâsse muthâle au pouorportant d'la ruette. La clyinnique 'tait tout modèrne par dédans et ch'tait là où'est qu'j'tais pouor aver m'n appouaintement. Lé cacheux d'taxi né pouvait pon appréchi san taxi jusqu'à l'entrée du bel (n'y'avait pon d'parqu'thie) et les rotchièrs apliatis dans lé c'mîn et l'assembliée d'gens empêchaient d'cachi pus liain. J'offris d'lî payi dêliêment ou pus tard.

Rêvé l'Jour d'l'An 2015

Viyiz étout:

Merrienne a un mauvais rêve

Ph'lip et son rêve

Merrienne et sa couvertuthe électrique