Les Pages Jèrriaises

Un rêve

J'tais à pédaler à la campangne dans un pays. La campangne 'tait pus à co pliate, mais jé m'dêtouônnis à dêtre amont un mont et lé c'mîn d'vînt pus rude - la tathe toute bûchie ès bords d'la route. La tèrre 'tait crèyeûthe, épis y'avait des crêtes et des raccros d'craie sale des deux bords du c'mîn coumme j'amontais. J'viyais à s'nêtre eune vallée en d'ssous d'mé; y'avait des monts d'craie au but d'la vallée et les côtis 'taient taqu'tés d'blianc et d'bouais foncés, ofûche des pîns. La susfache du c'mîn d'vînt grav'leûthe et les reues d'ma bike drissaient d'travèrs coumme jé pédalais mais jé continnais d'amonter sans grand problième. J'arrivis à haut et y'avait des cliôsées d'hèrbe auve des bâsses muthâles en pièrres et des fôssés, et né v'là l's acteurs tch'arrivaient l'travèrs des clios d'au liain. "Né v'chîn l's acteurs!" qu'tchitch'un briyit. Ch'tait pouor eune présentâtion historique et i' 'taient habilyi en vièrs costeunmes, pus à co bliancs et auve des câsaques et gilets en pales couleurs. Y'avait d'la musique étout, mais jé n'viyais pon d'sounneurs. Épis un c'valyi vînt galopant du bord dêtre; ch'tait un m'sagi habilyi en vièr costeunme étout. Il arrivit et fliantchit san chapé au liain; ch'tait d'lé ramâsser pouor l'î remporter. J'couothit quédaine et j'ramâssis l'chapé et j'tais pouor l'î r'bailli mais y'avait eune hardelle tchi mé d'mandit d'bailli l'chapé à lyi pouor qu'ou pûsse l'èrbailli au c'valyi. Ou 'tait janne et belle, ieune d's actrices d'la r'présentâtion historique, auve eune longue blianche cotelle à dgeûdrîns, des ribans à ses longs bruns g'veux roûffliés et eune fache souôriante, mais eune p'tite bouoche à rouoges lèvres. Ou m'talbâtait bein pliaîthammant pouor qué j'lî donnîsse lé chapé, tchi 'tait grand et êpais en gris pé d'bièvret pliutcheux (nutria). J'tais heutheux d'lî bailli l'chapé et ou s'en fut l'pâsser au c'valyi.

Rêvé l'1/2/2017

 

Viyiz étout:

 

Les Pages Jèrriaises