Les Pages Jèrriaises

Un rêve

Y'avait eune assembliée d'monde, dé jannes et d'vièrs, dans eune grande halle d'êcole. Ch'tait dans l'pâssé. Y'avait un tchoeu tchi 'tait pouor chanter, et dans chu tchoeu y'avait eune supèrsouothis. Nou n'savait pon qu'i' y'étha la dgèrre et qu'l'enn'mîn 'tait pouor attatchi l'êcole, mais eune supèrpèrsonne vînt si quédaine qué nou n'l'èrmèrtchit pon et halit la supèrsouothis du tchoeu et la muchit dans la tchuîsinne tchi s'adonnait sus la halle. Nou viyait d'un co par les f'nêt's les soudards d'l'enn'mîn tch'avanchaient tout l'tou d'l'êcole et dans la pannique tchiques fil'yes lus muchîtent dans la tchuîsinne étout mais ni la supèrsouothis ni la supèrpèrsonne aîdgit dans l'affaithe.

La supèrpèrsonne marchait l'travèrs d'la ville. Ch'tait la tchête dé niet et tout 'tait sombre en gris et nièr. Les rues 'taient d'sèrtées et les bâtisses n'avaient pon d'veues et i' 'taient sales et pus à co en d'lacres. Des gens au m'sespé lus fliantchaient des f'nêt's d'à haut des bâtisses et tchiyaient dans la rue. Lus corps fliottaient ava mais la supèrpèrsonne n'fit rein pouor les sauver.

Y'avait eune aubèrge ou restaurant à gauche tchi 'tait êcliaithi sombrément et des hoummes en fa lus en dêhalîtent, ayant décidé d'tchitter la ville.

Mé, j'entris dans eune boutique coumme siez un copeux dé g'veux et nou mé d'mandit si j'voudrais prendre part dans eune exèrcice dé thiâtre. J'accordis et pouor eune heuthe nou m'crititchait, dênîngrait, m'abafouait, mé traitait dé toutes les sortes. Y'ait un houmme auve mé qué nou traitait d'même. À la fîn d'l'heuthe ch'tait d'trotchi d'rôle, mais mé et l'houmme né 'taient pon sis dueûrs auve les cheins tch'avaient joué l'rôle dé nos maît's. Nou commentit à la fîn qué j'avais 'té mains sévèthe en r'venge et mé j'dis qué j'n'avais pon ieu envie dé l'faithe.

Épis j'tais dans eune pétite chambre dans eune hôtel auve un grand liet. N'y'avait dgéthe dé run l'tou du liet mais des gens arrivîtent pouor eune rêunnion et nou 'tait squouîzi contre les muthâles. Mé j'tais prêt pouor prendre la tchaîse au cagueva mais tchitchun d'aut' vînt présider la rêunnion et viyant qu'i' n'y'avait pon hardi d'leunmiéthe nou proposit d'alleunmer la veue, mais ché n'tait pon aîsi dé r'muer l'tou du liet pouor aveindre lé bouton.

Rêvé l'3/9/2018
 

Viyiz étout:

 

Les Pages Jèrriaises