Les Pages Jèrriaises

Des rêves dé l'êcole

J'tais eune d'mié-heuthe en r'tard pouor eune cliâsse. Y'avait des vielles gens dans la preunmié rangie des tchaîses dans la salle, mais mé, j'tais à bas dans l'bel auve un janne garçon à li'aîdgi fricachi d's oeux. J'ouvrînmes la boêtée d'oeux à la renvèrque et touos l's oeux 'taient sans cruque, avrônés et mouaîsis. Ch'tait împôssibl'ye dé fricachi ches oeux-là dans la câssetrole. Lé garçon 'tait mârri et fliantchit des p'tits bâtons dans la câssetrole. Les bâtons 'taient attîntés d'paqu'nôtes, dé boutons et d'ribans dé difféthentes couleurs.

***

J'tais à explyitchi un rêve à d's êtudgiants dans eune cliâsse. Lé rêve dans man rêve 'tait d'un match dé rugby en trais ou quat' parties.

***

Dans man rêve, j'èrgardais des portraits d'ma dreine journée d'êcole quand j'tais êcolyi. Y'avait un grand bouais dans l'bel épis eune muthâle et d's înmeubl'yes par driéthe tchi lus adonnaient sus l'bel. Tout 'tait ensolilyi. Y'avait tchiqu's'uns d'mes anmîns d'l'êcole mâtés souos l'bouais - y'avait eune manniéthe dé fête ou d'parti en allant dans l'bel auve des stâlles. M's anmîns m'sembliaient hardi maigres.

Rêvés au mais d'Octobre 2013

 

Viyiz étout:

 

Les Pages Jèrriaises