J'tais à eune caûchie tchi n'tait pon en Jèrri. Y'avait deux tchais à drouaite et à gauche, et eune grande montée pavée en grannit tchi d'valait à gauche. Y'avait des p'tites boutiques et eune p'tite vielle hôtel au pouorportant des tchais.
Nou 'tait s'posé d'env'yer des paîssons à eune mannifactuthe tchi 'tait eune cardéthie pouor êt' cardés. Un grand ouadgîn vînt à la caûchie. L'ouadgîn 'tait rouoge et avait un ênorme vivyi en vèrre tchi 'tait tout pliein d'paîssons. Ches paîssons 'taient grands et longs, rouoges et blius, auve des longs mûsieaux. Lus rouoges et bliues êcrèdes lithaient au solé coumme lé vivyi sus l'ouadgîn fut canté et l'cont'nu du vivyi - les paîssons et l'ieau - fut vèrsé dans l'ieau d'la caûchie. Les paîssons nageaient dans l'ieau en dgéthotant. Jé n'savais pon pouortchi qu'nou lâtchait les paîssons au run d'les d'livrer à la cardéthie. Tchitch'un arrivit en montant amont la montée pavé. I' halait eune boête ou eune câsse sus des rouôlettes. La câsse 'tait couèrte d'un design en pliastique dé blius et rouoges paîssons, coumme les cheins qu'nou-s'avait vèrsé dans la caûchie. Sus la muthâle d'a montée, y'avait un êcritchieau bêlong tchi 'tait d'la publyicité pouor du cap'lain.
Rêvé l'10 d'Dézembre 2014
Viyiz étout: