Les Pages Jèrriaises

Un rêve

J'voulêmes vîsiter l'tèrrain d'un châté ou mangni; y'avait eune bouaîs'sie tout l'tou et du paysage întérêssant mais jé n'pouvêmes pon aver l'accès au tèrrain sans faithe lé feint qué j'têmes pouor louer la propriêté. Nou nos laîssit nos pronm'ner par eune sente par les bords rotcheurs d'un russé parmi les bouais. La Danme du mangni (ou ch'tait-i' un châté?) vînt en ville acanté nous, criyant qué j'têmes pouor louer la propriêté. Y'avait eune fête en allant en ville. La ville 'tait au bord d'eune riviéthe et y'avait eune pétite caûchie d'un bord d'la pièche du mitan d'la ville. Y'avait eune montée en grannit et un p'tit tchait. Sus l'haut d'la montée y'avait un jonglieux habilyi en giant: en blianche quémînse, néthes braies, et bliouques. I' 'tait jutchi sus des gaûlouoches et jouait eune manniéthe dé pouque à vent. I' nos mouontrit sa pouque à vent: les pipes 'taient hardi longues en pliastique transpathente, et la pouque 'tait longue et néthe en la même marchandise qu'un pouque à dos. J'èrvînmes au mangni/châté et là dans l'bel y'avant des femmes en bannètes et eune docteûthe dé lîndgistique tchi voulait d'mander des tchestchions.

Rêvé au mais d'Octobre 2015
 

Viyiz étout:

 

Les Pages Jèrriaises