Un rêve

J'tais dans un café auve eune pétite dgaîngue dé gens. J'têmes attabliés pus à co dans l'mitan du café l'tou d'eune pétite tabl'ye, patchis comme des sardinnes ouaithe qu'i' y'eûsse un tas d'run. Eune sèrveuse habilyie d'la vielle faichon en nièr et blianc auve un d'vanté bordé d'dentelle et un p'tit blianc bonnet d'dentelle sèrvait la pratique. Y'avait un chouaix d'eune assiettée d'thée d'arlévée et un thée d's années 30s.

J'tais assis sus un banc d'un bord d'la tabl'ye entre un janne homme à dêtre et eune hardelle à longs bruns g'veux à s'nêtre. J'tais poussé à gauche contre lyi et man corps 'tait forchi quâsîment sus lyi. J'm'extchûthis mais ou n'sembliait pon trop gênée. Ou tâchait d'liéthe san livre à portraits, et j'lé liêthêmes ensembl'ye viyons qu'la dgaîngue lé tou d'la tabl'ye 'tait si patchie. Sus eune page y'avait un p'tit portrait d'la fache à la hardelle au ras d'un paragraphe, mais ch'tait un aut' paragraphe tchi 'tait d'întéthét et j'distchutînmes comme tchi traduithe eune phrâse tchi sembliait êt' un mio en Latîn. Nou sé d'mandit si l'mot dim 'tait eune partie d'eune construction Latinne.

Dans l'café y'avait des pliaintes qu'lé thée d's années 30s né 'tait pon un vrai thée. J'èrgardînmes l'assiettée qu'la sèrveuse portait et ch'tait du blianc-mange couleu d'rose auve d'la crème. Nou dîthait qué ch'tait bouôn mais ché n'tait vraînment pon d'la manniéthe des années trente. L'aut' assiettée d'thée 'tait du traditionnel auve des gâches à lait d'beurre, d'la crème, et d'la g'lée d'frâses.