J'tais dans eune vielle ville auve un tas dé p'tites ruettes toutes drédilyies et pavées. Et y'avait des p'tits gardîns auve des bârrotîns l'avant ès maîsons avaû les rues. I' 'tait niet et les pavés lithaient dans la lueu. J'entris dans l'marchi mais ch'tait trop tard et toutes les stâlles 'taient freunmées. J'viyais des boêtées en pliastique dé poulet sus d's êtalages à s'nêtre mais n'y'avait fis d'âme. Lé marchi 'tait tout êcliaithi tout coumme. La maîntchi du marchi 'tait en travaux. La partie d'dêtre du marchi avait des mâtants auve des châchais d'mâtés peints en blianc. J'marchis l'travèrs du marchi et né v'là eune femme. J'avais à cachi eune blianche vainne par un système dé vidgo et chenna s'pâssit bein mais quand j'rêprouvis, jé n'pouvais pon vaie tout lé c'mîn dans la néthe niet sus l'êcran et jé n'pus pon êvader un êtotchet. La vainne croch'tit l'êtotchet mais j'réalîsis qué j'avais 'té à contrôler l'mauvais boulant: ch'tait un blianc ouadgîn d'salop'thie qu'j'avais cachi d'au liain au run, et né v'là pouortchi qu'j'avais ieu d'la diffitchulté d'vaie lé c'mîn l'avant au boulant et qué j'n'avais pon mênagi d'agencer l'ouadgîn.
Rêvé l'3/11/2017
Viyiz étout: