J'tais sus ma bike et j'arrivis dans eune ville qué jé n'connaîssais pon. Jé touônnis la carre, un mio amont et mé v'là dans la grande rue d'la ville. J'pâssis eune êtchipe dé filméthie d'la télévision au c'menchement d'la rue et jé d'valis d'ma bike viyant qu'la rue 'tait plieine dé monde habilyis pouor l'Êté dans des habits couleuthés. Lé solé lithait et y'avait tout pliein d'boutiques et d'cafés et restaurants auve des tabl'yes et tchaîses sus les choses publyiques et des bouais dans la rue tch'abriaient l'monde du solé. Mais la rue 'tait bein êtraite et nou n'pouvait dgéthe pâsser. L'êtchipe d'la télévision 'tait à faithe des entréveues auve des pâssants et i' m'rattrapîtent et m'achîtrîtent pouor faithe eune entréveue, mé. I' voulaient mé d'mander entouor la situâtion êcononmique et l'av'nîn du dêmnîn auprés l'êpidémie. J'accordis d'faithe eune entréveue, mais y'avait trop d'monde dans la rue et n'y'avait pon assez d'run pouor filmer, et don j'nos en feûnmes driéthe eune boulangu'thie où'est qu'i' y'avait un grand bel auve du run assez pouor partchi deux-trais vainnes dé difféthentes couleurs pouor d'livrer ou ramâsser du pain. Dans l'bel y'avait des bordeûthes dé flieurs et eune grande cage dans la carre du bel. Nou m'mâtit quâsiment au mitan du bel auve la cage driéthe mé. Eune journaliste dans eune rouoge câsaque sé cârrit à seule fîn dé m'filer un mio d'au liain et ou s'crapaûdit l'avant à eune bordeûthe, épis un aut' membre dé l'êtchipe pliaichit un aut' caméra quâsiment entre mes pids en pouaintant amont. Mé j'dis qué j'éthais à m'exprînmer atout man froutchet, mais nou m'dit qu'chenna marchéthait bein coumme chenna. Nou c'menchit à haler l'entréveue, et j'avais tout pliein à dithe entouor l'êcononmie, mais y'avait tant d'disteurbé dé d'dans la cage driéthe mé qu'nou-s'arrêtit la filméthie. Ch'est en tchi dans la cage y'avait un fliotchet d'cŷngnes et l'mâle 'tait à caûtchi les feunmelles en ail'tonnant briyamment.
Rêvé l'27/3/2021
Viyiz étout: