J'tais sus la strade dans eune grande salle. Jé jouais l'violon dans eune présentâtion d'musique minnimaliste. Y'avait étout eune jouôrêsse dé bâsse dé viole et un joueux d'doubl'ye bâsse. Eune chant'rêsse 'tait là pouor lé concert étout. L'audienche chantûthait d's êtchelles dé musique étout. Pouor ag'ver l'concert nou fit des gestes atout ses bras en silence.
En d'houors la musique militaithe 'tait pouor marchi pouor la fîn d'sa saison tchi 'tait la r'traite des troupes. Nou-s'app'lait chenna "battre êcart" ou s'lon l's Îles "battre carre" ou "battre quart".
J'èrvîns dans la salle. Achteu n'y'avait pèrsonne là, mais j'ouïs un brit dé d'dans les p'tites maîsons à un but d'la salle. J'entris par ieune des deux portes. Y'avait eune allée auve, d'un bord, eune rangie dé stâlles au pouorportant. J'briyis mais n'y'avait pon d'rêponse. Tout coumme j'tais pèrsuadé qu'i' y'avait tchitch'un dans ieune des stâlles. J'n'avais pon d'arme, et j'pensis qué j'dévthais faithe dé tchi pouor happer l'întrus. Atout ma plieunme jé laîssis couler un p'tit russé d'néthe encre avaû l'allée pouor qu'l'întrus laîssîsse des empreintes dé san cauchement. J'happis la pathe, mais j'ouïs un cri d'femme. Quand j'rentris dans la salle la police 'tait là et nou m'dit qu'il' avaient trouvé d's empreintes dé grandes bottes en encre dans l'aithe.
Nou vînt explyitchi les règl'yes d'eune gamme Bastchaise. Nou pitchait eune balle épis nou mèrtchait châque fais eune mèrque sus eune vielle tinne dans l'aithe atout un bâton tch'avait d'la craie attatchie au but. Ch'est en tchi nou pouvait faithe eune mèrque dé craie dans lé d'dans d'la tinne ou sus lé d'houors mais tchi difféthence qué ch'la faîthait jé n'savais pon.
Rêvé l'15/4/2023
Viyiz étout: