Les Pages Jèrriaises

Un rêve

J'accompangnais eune policemainne à un restaurant auprès sa journée d'travas. Y'avait eune fête et l'restaurant, tch'avait hardi d'salles sus des difféthents nivieaux, présentait des divèrtissements dans châque salle, des sounneurs et des chanteurs. Y'avait des lantèrnes dé difféthentes couleurs dans les salles. J'pâssînmes eune salle êcliaithie en vèrt où'est qu'eune chant'rêsse chantait à l'entrée. J'montînmes des d'grés pouor pâsser dans l'gardîn. Un houmme dans un costeunme dé gorille, muchi driéthe les ridgieaux, happit lé p'tit marmoûset tchi 'tait sus l'sofa. J'êpyînmes lé gorille tchi cachait eune vaituthe hors d'ilo la niet.

L'matîn, j'tais dans eune pétite poste tchique bord. Y'avait un compteux auve un êcran en vèrre l'travèrs. L'êcran avait un creux à seule fîn qu'la maitrêsse dé poste pouvait pâler ès pratiques. Mais la maitrêsse dé poste n'tait pon là. Driéthe lé compteux, ch'tait san janne fis, un p'tit roux, tchi gardait la boutique. Nou viyait raîque sa fache au d'ssus du compteux. J'voulais acater un DVD, mais l'garçon n'voulait pon m'lé vendre. Viyant qu'i' n'tait pon du nivé du creux dans l'vèrre, ch'ait hard dû dé l'ouï. Lé DVD 'tait rêsèrve ès cheins âgis d'pus d'treize ans, et l'garçon n'pouvait pon distîndgi si j'avais pus d'treize ans. J'lî dis qu'i' 'tait d'mêtchi d'aller qu'si sa méthe.

Rêvé l'20/3/2011
Geraint Jennings

 

Viyiz étout:

Les Pages Jèrriaises