|
J'tais à viagi d'ville en ville en Êcôsse et j'arrivis dans eune grande ville et j'tais pouor rester dans eune pension. Jé d'valis d'ma chambre pouor m'dêhaler en ville. L'hôtel 'tait bein vielle et sombre et p'tite coumme un coupl'ye dé maîsons mînses ensembl'ye et j'avais à pâsser par des p'tites allées et des portes et des ridgieaux pouor arriver à la grande porte viyant qu'i' n'y'avait pon d'pèrsonnel duther l'heuthe du dînner. Jé m'dêhalis et la rue 'tait toute ensolilyie auprès la sombre hôtel et j'm'en fus en ville. J'entris dans l'marchi. Y'avait un tas d'monde dans chu marchi traditionnel et Victorien. Lé bâtisse avait 'té bein maintînt ou autrément r'nouv'lé ch'est en tchi la peintuthe lithait sus les colonnes en fé tch'atootaient l'lief en vèrre et tout 'tait cliai et couleuthé en rouoge, blianc, et bliu. À l'entrée par dédans y'avait des banniéthes pouor eune fête dé mangi Îndgien et y'avait des stâlles à vendre des fricots Îndgiens. Lé marchi 'tait embarrassé auve des vîsiteurs et des vîsites dgidées. Nou r'mèrtchait partitchuliéthement les dêcothâthions des colonnes. âu haut des colonnes en fé peintes en rouoge, blianc et bliu, y'avait des grandes stchulptuthes dé faches, bein pus grandes qué chein qu'nou vait d'couôteunmes au hout d'colonnes. Ches vîsagiéthes 'taient ênormes et r'présentaient des héros d'l'Empithe Britannique coumme Nelson. Y'en avait dans les trais-quat' au haut d'châque colonne et peintes étout coumme lé restant du fé. J'pâssis d'l'entrée du marchi dans la grande salle tchi 'tait ênorme. À un but y'avait la côtchiéthe d'un châté Êcôssais (coumme ch'tait la muthâle du marchi) et des montées en grannit. J'allais boutitchi ès stâlles tchi 'taient modèrnes et faichonnabl'yes. Dans ieune des stâlles - i' taient pus à co coumme des boutiques des deux bords d's allées du marchi - j'pâlis auve eune belle boutitchiéthe tchi m'explyitchit lus dêmnîn d'paîssonyi à graie du paîsson dans des sauces et tout chenna. Jé c'mandis des ribans d'paîsson trempé dans d'la vinnaigrette épis j'm'en fus acater tchiquechose d'aut' en dîthant qu'j'èrpâss'sais ramâsser man patchet bétôt. Mais quand j'èrvîns à la stâlle les paîssonnièrs avaient dêjà patchi la boutique et chenna auve man patchet d'paîsson. Lé boutitchi s'en fut l'èrtrouver dans l'stôrre et j'èrpâlis auve la belle boutitchiéthe (ou 'tait blionde). Y'avait eune présentâtion tchi c'menchait auve d'la mûsique et des veues. J'montis amont les montées en grannit mais la musique 'tait mâté tchique bord à haut sus les d'grés et j'fis un dêtou sus la bliête l'avant au châté. Ch'tait coumme un raide côti l'avant à la côtchiéthe dé châté tchi s'adonnait sus l'marchi. Ch'tait la tchête dé jeu et dans la nièrcheu l's illeunminnâtions du gardîn 'taient mangnifique et y'avait des veues dans l'marchi et des gens a lus rêjoui d'la fête. Et les grandes faches d'héros 'taient illeunminnées étout. La bliête 'tait bein raide et en bas y'avait un long dro ava sus l'marchi. Mais y'avait des coupl'yes dans lé p'tit gardîn étout. Rêvé l'4/2/2018 |
Viyiz étout: