J'avais 'té commissionné pouor faithe des grands portraits dans un aéroport pouor les muthâles des allées où'est qu'les passagièrs pâssaient pouor embèrtchi à bord les avions.
Appathemment l'aéroport 'tait à Londres et i' 'tait tout à fait ênorme. Des touristes Allemands criyaient qué l'aéroport 'tait la ville entchiéthe viyant toutes les boutiques au mitan d'l'aéroport.
L'aéroport 'tait bein modèrne, tout en méta et vèrre, et j'dévais faithe des grands portraits pouor les muthâles en nièr-et-blianc: des pannieaux tchi mouontraient eune histouaithe entouor des navidgants naufragis sus eune île désèrte. Les navidgants 'taient habilyis dans des vièrs habits - du dgiêx-huitième siècl'ye, sembliait-i'. Sus chutte île y'avait des marmoûsets volants et d's aigl'yes êlectriques tchi lus battaient dans les cieux au d'ssus d'l'île.
Ches portraits sembliaient mangnifiques sus les muthâles, mais jé n'sais pon pouortchi qu'chutte histouaithe avait 'té chouaîsie pouor dêcorer l'aéroport.
J'allis à la salle d'Air France et j'tais à pâler auve les assistants au compteux. La salle d'Air France 'tait bein mains modèrne qu'l'aéroport (ch'tait un mio coumme l'aéroport d'Southampton soulait êt' quand j'tais mousse, mais bein pus confortabl'ye). Les tchaîses dans tchi qu'les passagièrs 'taient à attendre 'taient en bouais auve des pourpres couôssîns.
Quandis qué j'tais à pâler d'vant l'compteux d'Air France, eune stioûardêsse êprouvit dé m'pâsser, et m'brûlit sus l'bras auve sa cigarette. Chenna m'fît ma! Et jé d'mandis la boête des preunmièrs soins pouor souongni man bras.
Un assistant d'Air France auve eune bliue castchette apportit eune bouqu'tée dg'ieau et eune pompe à bike, et j'allînmes hors sus la bliête d'vant l'aéroport. Là, j'faisais sèrvi la pompe pouor sprayé l'monde auve l'ieau et j'tions à chanter "La Dgilliotinne" touos ensembl'ye.
Né v'chîn man rêve.
Geraint Jennings
10/1/2001
Viyiz étout: